Fəal(interaktiv) təlim
Fəal/interaktiv təlim üzrə keçirilən dərslərin mərhələləri və onlarda görülən
işlər
Fəal/interaktiv təlimlə bağlı aparılan dərslərin məğzində də qrup işi aparıcı mövqeyə
çıxır və onun mərhələləri, təxmini vaxt bölgüsü aşağıdakı şəkildə olur:
1.
Motivasiya
....................................................3 dəq.
2.
Tədqiqatın
aparılması ...............................
9 dəq.
3.
Məlumat
mübadiləsi ...................................10 dəq.
4.
Məlumatın
müzakirəsi və təşkili ..................7 dəq.
5.
Nəticələrin
çıxarılması ............................... 5
dəq.
6.
Yaradıcı
tətbiqetmə .................................... 8 dəq.
7.
Refleksiya
(və ya qiymətləndirmə,
bütün mərhələlərdə
aparıla bilər)..................... 3 dəq.
Cəmi:
45 dəq.
1. Motivasiya. Fəal/interaktiv dərsin birinci və
ən vacib mərhələsi bünövrə rolunu oynayan motivasiya mərhələsidir. Motivasiya mərhələsinin əsas vəzifəsi
idraki fəallığın yaradılmasıdır. Bu mərhələ dərsin başlanmasına şagirdləri
səfərbər edir, onlarda fikri fəallığı yaradır, yeni öyrəniləcək mövzuya –
problemin qoyulmasına, hazırlıq işlərini
həyata keçirməyə intensiv maraq oyadır və problemin tədqiq olunması üçün tədqiqat sualını meydana gətirir. Tədqiqat sualı qoyulduqdan sonra
şagirdlər həmin problemin ilkin həlli variantlarına dair öz proqnozlarını verirlər. Müəllim həmin
variantları bir-bir lövhədə qeyd edir. Bu zaman təkrarlar nəzərə alınmır(Qeyd: ənənəvi
dərslərdən fərqli olaraq fəal/interaktiv təlimdə dərsin başlanğıcında yeni
mövzu, adətən, elan olunmur. Motivasiya mərhələsi yeni öyrəniləcək mövzunu
problem kimi şagirdlərin özlərinə tapdırır).
Motivasiya
mərhələsi həmçinin təlim prosesində psixoloji, emosional və işgüzar
mühitin yaranmasına imkan yaradır.
Motivasiya
sözünün mənası sübutlar, əsaslar, dəlillər, səbəblər deməkdir. Fəal təlimdə bu
mərhələ faktlara söykənməklə, nəyəsə, hansı istiqamətəsə fikir və düşüncənin
yönləndirilməsidir. Bu mərhələdə faktlara söykənmək dedikdə şagirdlər şəxsi qənaətlərinə,
biliklərinə, təsəvvürlərinə, dünyagörüşlərinə, həyati təcrübələrinə müraciət etməklə problemin həll
olunması yollarına dair ilkin fərziyyələrini
irəli sürürlər və fikirlərini əsaslandırmağa cəhd edirlər. İlkin fərziyyələrin
lövhəyə qeyd olunması ilə motivasiya mərhələsi öz işini yekunlaşdırır.
Deyilənləri
yekunlaşdıraraq motivasiya mərhələsində görülən işləri belə ümumiləşdirə bilərik.
Bu mərhələdə əvvəlcə mövzu tapdırılır və o, lövhəyə qeyd olunur,
sonra isə həmin mövzu ilə bağlı tədqiqat
sualı ortaya qoyulur və o sual da mövzunun altında lövhəyə yazılır, daha
sonra isə qoyulmuş suala şagirdlərin ilkin fərziyyələri alınaraq lövhəyə qeyd
olunur
Motivasiya
mərhələsində mövzunun tapdırılması üçün müxtəlif vasitələrdən istifadə etmək
olar. Buraya metodik ədəbiyyatda müxtəlif vasitələri daxil edir və adını da simvollu materialların şərh edilməsi
qoyurlar. Simvollu materiallar mövzuya bir işarə, yönəltmə kimi qəbul edilməlidir.
Bu simvollu materiallar sanki "oğrunun yadına daş salır". Belə
ki şagirdlərə tədris olunacaq mövzu ilə
bağlı müxtəlif simvollu materiallar - şəkil,
sxem, simvol, təranə(melodiya), bədii əsərdən bir fraqment, əşya, rəvayət, tapmaca,
hikmətli söz, atalar sözləri, şeir parçası, kinofilmdən kiçik bir fraqment,
musiqi klipindən bir parça, portret, rəssamlıq işi, qrafik və s. təqdim olunur və onlardan
soruşulur: (Əgər Siz istənilən bir görüntünü - şəkil, portret, tablo və s.
nümayiş etdirirsinizsə, onda), - Uşaqlar, Siz burada nə görürsünüz? sualını
qoyursunuz. Şagirdlərdən cavab
aldıqdan sonra ikinci bir sual ünvanlayırsınız: Bu mənzərə( və ya şəkil, tablo, lövhə…) xoşunuza gəldimi? Şagirdlərin
cavabı dinlənildikdən sonra onlara təklif olunur ki, öz təəssüratlarını, fikir
və qənaətlərini əsaslandırsınlar. Bunun
üçün müəllim onlara Nəyə əsasən belə
düşünürsünüz? sualını verir və onların təəssüratlarını dinləyir. Sonra isə
onlara yeni bir sual ünvanlayır: -
Uşaqlar, deməli, biz bu gün nə barədə danışacağıq?(və ya biz bu gün hansı mövzudan
söz açacağıq? Təbii ki, şagirdlər nədən söhbət açılacağını dərhal təxmin edə
biləcəklər. Çünki müəllimin təqdim etdiyi material mütləq mövzunu ortaya
çıxarır(və çıxarmalıdır). Şagirdlərin cavabı alınandan sonra müəllim davam
edir: - Uşaqlar, Siz çox doğru
buyurdunuz. Bu gün biz ….(tutaq ki,
bahardan, payızdan, təbiətdən, şəlalədən və s.) danışacağıq. Müəllim mövzunun adını dəqiq şəkildə lövhəyə qeyd
edir.
Tutaq
ki, V sinifdə Abbas Səhhətin "Yay səhəri" və ya S.Vurğunun
"Ceyran" şeirlərindən birinin tədrisinə bu yönümlü motivasiya
qurulmalıdır. Mövzunun tapdırılması üçün müəllim internet axtarış sistemindən bəhrələnərək
birinci mövzuya dair(yay səhəri, yay, yay lövhələrinə dair) yay şəkillər sözünü
yazır. Bu zaman minlərlə həmin mövzu aid
şəkillər olduğu göstərilir. Müəllimi lazım bildiyi şəklin sürətini çıxarmaqla dərsdə nümayiş etdirə bilər. Eləcə də Ceyran
sözünü axtarış sisteminə daxil edib müvafiq bir şəkli surətini çıxarmaqla dərsdə
nümayiş etdirə bilər. Əgər məktəbin internet şəbəkəsi varsa, elə sinifdə canlı,
rəngli formada da onları tapıb göstərmək mümkündür.
Və ya
ceyran şəkillərindən birini seçib göstərmək olar:
Əgər istənilən bir musiqi parçasını, klipi səsləndirirsinizsə,
onda işi bu cür təşkil edirsiniz: - Uşaqlar,
gəlin bir musiqi parçası dinləyək, görək orada hansı hisslər tərənnüm olunur. Sonra müəllim səsləndiriləcək
vəsaiti şagirdlərə təqdim edir və onlardan soruşur: Siz nə dinlədiniz?(nə eşitdiniz?) Dinlədiyiniz parça xoşunuza gəldimi,
o, Sizdə hansı hisslər yaratdı? Cavablar
dinlənildikdən sonra müəllim yenidən soruşur: - Uşaqlar, deməli, bu gün biz nədən söhbət açacağıq? Şagirdlər öz təxminlərini
bildirir və müəllim ona əsaslanmaqla mövzunun adını dəqiq şəkildə lövhəyə qeyd
edir. – Uşaqlar, Siz düzgün buyurdunuz,
biz bu gün ... barəsində dərs keçəcəyik( və ya söhbət açacağıq). Tutaq ki,
V sinifdə H. Arifin "Analar" şeiri keçilir. Bu zaman analar barəsində
istənilən bir musiqi parçasını internetdən tapıb fleş yaddaşa köçürüb sinifdə
ondan bir fraqmenti səsləndirmək olar. Səsləndirəndən sonra isə iş yuxarıda təqdim
etdiyimiz ardıcıllıqla davam edə bilər.
Əgər mövzunun tapdırılması üçün bədii parçalar,
hikmətli və atalar sözləri və s. səsləndirilərsə,
onda onlar dinlətdirilməli, sonra təəssüratlar alınmalı, sonra səsləndirilən
parçada nədən söhbət getdiyi soruşulmalı və nəhayət, bu gün nə barədə
danışılacaqdır sualı vasitəsi ilə mövzunun adı tapdırılmalıdır. Təxminən belə:
- Uşaqlar, Siz bu eşitdiyiniz
parçadan xoşunuz gəldimi? Nəyə əsasən bu qənaətə gəldiniz? Sizcə, bu mətndə nədən danışıldı? Bəs bu gün biz nədən
danışacağıq? Onda bizim mövzumuz necə adlana bilər? suallarını ardıcıllıqla qoyursunuz. Şagirdlərdən cavab aldıqdan sonra
davam edirsiniz: - Uşaqlar, Siz çox
doğru buyurdunuz. Bu gün biz ….(tutaq ki,
bahardan, payızdan, təbiətdən, şəlalədən və s.) danışacağıq. Müəllim mövzunun adını dəqiq şəkildə lövhəyə qeyd
edir.
Motivasiya
mərhələsinin ikinci bir addımı(mövzunun adı tapdırıldıqdan sonra) tədqiqat sualının ortaya qoyulmasıdır. Müəllimlər
çox zaman bu sualların qoyuluşunda, onun tərtib olunmasında çətinlik çəkirlər.
Bunun əsas səbəbi tədqiqat sualı ilə dərsin məqsədi arasında əlaqənin düzgün qurulmamasıdır.
Müəllimlər bu əlaqəni aydın təsəvvür etmədiklərindən elə çətin tədqiqat sualı
uydurub ortaya qoyurlar ki, ona özləri
belə cavab verməkdə aciz qalırlar.
Tədqiqat
sualı birbaşa dərsin mövzusu və məqsədi ilə bağlı olmalıdır. Məlum məsələdir ki,
bu dərsdə müəllim nəyi uşaqlara qazandıracağını aydın təsəvvür etməli, elə onu
da tədqiqat sual kimi ortaya qoymalı və lövhəyə qeyd etməlidir. Bir neçə sadə variantı nəzərinizə çatdırmaq
istəyirik. Tutaq ki, Siz, dostluq mövzusunda bir əsəri, hekayəni keçəcəksiniz.
Bu zaman bu variantlardan birinə müraciət etməklə belə bir iş görürsünüz. Əvvəlcə,
dostluq haqqında gözəl bir atlar sözü – "dost
dosta tən gərək, tən olmasa, gen gərək" (iki atalar sözündən çox
olmaz) səsləndirirsiniz. Şagirdlərdən
onun məzmununa, mənasına münasibət bildirməyi, fikirlərini əsaslandırmağı xahiş
edirsiniz. Sonra isə soruşursunuz: bu atalar sözlərindən nədən söhbət getdi? Təbidir
ki, şagirdlər dostluq cavabını verəcəklər.
Bu cavabın arxasınca, Deməli, biz bu gün
hansı mövzudan söz açacağıq? Şagirdlər cavab verirlər ki, yəqin ki, dostluq barəsində danışılacaq.
Müəllim onlara mövzunu düz tapdıqları üçün təşəkkür edir və dərsin adını dəqiq
şəkildə lövhəyə qeyd edir: Q.Zakir "Sədaqətli dostlar
haqqında"( qeyd: bu mövzu VI sinifdə keçilir - F.Y.). Sonra tədqiqat sualını elan edir və
onu lövhəyə yazır: - Uşaqlar, gəlin
mövzunun adına diqqətlə fikir verək. O necə adlanır? Şagirdlər mövzunu səsləndirirlər.
Müəllim: - Siz necə bilirsiniz, Hansı
dostları sədaqətli dost hesab etmək
olar? Müəllim bu sualı deyildiyi kimi də lövhəyə yazır və sinfin sual ətrafında
düşüncələrinin alaraq qısa şəkildə tədqiqat
sualının altında qeyd edir. İş tamamlandıqdan sonra müəllim sinfə müraciət
edir. Necə bilirsiniz, bəs mətndə sədaqətli
dostlar barəsində hansı məqamlardan söz açıla bilər? Şagirdlər deyəcəklər
ki, müəllim, yəqin ki, bizim dediyimiz
keyfiyyətlərə orada da müraciət oluna bilər. Müəllim bu cavabı aldıqdan
sonra: Elə isə gəlin dediklərimizin nə dərəcədə
doğru olduğunu yoxlama başlayaq. Biz bunun üçün axtarışa çıxmalı, mətnə nəzər
salmalıyıq. Gəlin əvvəlcə qruplara bölünək... (Bundan sonra qrup
tapşırıqları verilir və dərsin o biri mərhələləri üzrə iş davam etdirilir)
Tədqiqat
sualının qoyulmasının müxtəlif variantları vardır. Ən sadəsi belədir ki,
mövzunun adı tapılandan sonra şagirdlərdən soruşula bilər: Sizcə, bu mətndə bu barədə nə danışıla bilər?(bu tipli sualları
daha çox epik əsərlərə qoymaq olar – F.Y.) və ya Əgər Siz şair olsa idiniz, bu gördüyünüz ceyranı hansı sözlərlə
oxucunuza – bizə sevdirərdiniz?(bu tipli sualları isə daha çox şeir
parçalarına – lirik əsərlərə qoymaq məsləhətdir –F.Y.). Ümumiyyətlə götürsək,
şeir parçalar üzərində işləyəndə bu tipli sualların verilməsi olduqca məqsədəuyğundur.
Siz yaxşı bilirsiniz ki, şeir parçası ətraf aləmə şairin obrazlı münasibətinin nəticəsidir.
Ona görə də hər nə olsa da, bu cür əsərlər keçiləndə şagirdlərimizə imkan vermək
lazımdır ki, onlar istənilən təsvir, tərənnüm obyekti ilə bağlı öz poetik
düşüncələrini əks etdirən sözləri desinlər: obrazlı olub-olmaması sizi hədəfdən
yayındırmasın. Yetər ki, onlar ürəklərindən keçən ən xoş, ən gözəl sözləri seçib
söyləyə bilsinlər. Siz onları bir-bir lövhəyə qeyd edir və sonra isə dərsin
növbəti mərhələsinə keçirsiniz.
Başqa
bir nümunəyə nəzər salaq. Məsələn, VIII
sinifdə "N. Gəncəvinin həyatı və yaradıcılığı" mövzusu keçilərkən
dərsin başlanğıcında a) şairin portreti nümayiş oluna bilər,
b) əsərinə
yazılmış bir təranə səsləndirilə bilər,
c)
onun barəsində müasirlərinin dediyi bir fikir səsləndirilə bilər,
d) bədii
əsərlərindən ibrətli fraqmentlər seçilə bilər və o sinifdə səsləndirilər,
e) ola
bilsin ki, əsərlərinə həsr olunan şəkil nümayiş etdirilə bilər; Bəhram Gurun,
Nizami metrosundakı mozaikalardan bir fraqment, Nizami adına əlyazmalar
institutunun binası, «Nizami» kinoteatrının binası və s.
Simvollu
materiallı dinləyən(və ya görüntünü seyr edən) şagirdlərdən soruşulur: Buradakı
fikirlər Sizin xoşunuza gəldimi? Şagirdlərin cavabı alındıqdan sonra öz fikirlərini
əsaslandırmaq xahiş olunur. Sonra isə bu parçanın(və ya fikirlərin kim haqqında
olduğu) kimə aid olduğu şagirdlərdən soruşula bilər(Unutmayın ki, əgər həmin
parçada Nizami kəlməsi yoxdursa, Nizamiyə aid bir işarə verilməyibsə, onda onu
səsləndirməyə dəyməz. Çünki sözün kimdən getdiyini, məsələnin kiminlə
bağlandığını ancaq mətndəki işarələrdən tapmaq mümkündür). Şagirdlər mövzunu
tapdıqdan müəllim onu dəqiq şəkildə lövhəyə qeyd edir: - Uşaqlar, Siz doğru
buyurdunuz, biz bu gün böyük şairimiz Nizamidən danışacağıq. Gəlin, onu
yaxından tanımağa çalışaq. Müəllim bu sözləri deyib lövhəyə "Nizaminin həyat
və yaradıcılığı" başlığını qeyd edir. Sonra isə aşağıdakı tədqiqat sualını
onların diqqətinə çatdırır: Sizcə, bu dərsdə Nizaminin həyatı və yaradıcılığı
barədə biz nə kimi məlumatlar əldə edə
biləcəyik? Şagirdlərin təxminləri alınaraq lövhəyə qeyd olunur.
Tədqiqat
sualını başqa vasitələrdən istifadə etməklə də qoymaq olar. Metodik ədəbiyyatda
buna sual verməyə həvəsləndirmə deyilir. Əvvəllər bu formalar suallardan
istifadə yolu adlandırılırdı.
A) Mövzu
tapdırıldıqdan sonra müəllim sinfə belə bir sualla müraciət edir: Biz
bu məsələ ilə bağlı nəyi bilirik, nəyi bilmirik? Əvvəlcə, nəyi bilirik sualına cavablar alınır.
Sonra bu barədə nələri bilmirik və ya nələri öyrənmək bizə faydalı olardı?
sualına aid suallar cərgəsi yaradılır və
onlardan mövzuya daha yaxın olanı hazırkı mövzu üçün tədqiqat sualı kimi istifadə
olunur.
Məsələn,
VIII sinifdə Nizami mövzusu tapdırıldıqdan sonra müəllim şagirdlərdən soruşur:
biz Nizami Gəncəvi ilə bağlı nələri bilirik? Şagirdlər müxtəlif cavablar verirlər
və müəllim onları lövhədə qeyd edir. Sonra yenidən şagirdlərə sualla müraciət
olunur: Biz onun haqqında daha nələr öyrənmək istərdik? Şagirdlərin verdikləri
cavablar lövhədə qeyd olunur. Və onlardan bilavasitə mövzu ilə bağlı olanı tədqiqat
sualı kimi dairəyə alınır. Məsələn, Nizaminin həyat və yaradıcılığını səciyyələndirən
əsas cəhətlər? Sonra müəllim bu suala dair ilkin təsəvvürləri alıb lövhəyə
yazır və dərsin növbəti mərhələsinə keçir.
B)
Açıq suallardan istifadə yolu ilə. Açıq suallar o suallardır ki, onun bir neçə variantda cavabı
olur. Belə sualların tərkibində niyə, nə
üçün, nə səbəbə görə, hansı, hansı keyfiyyətlərinə görə, əgər belə olmasaydı
nə baş verə bilərdi, bu məsələnin səmərəli həlli yollarını nədə görürsünüz və nəyə
görə belə düşünürsünüz və s. söz və ifadələrdən istifadə olunmalıdır. Məsələn,
yenə də VIII sinifdə Nizami mövzusunu
şagirdə tapdırdıqdan sonra onları belə bir sual ətrafında tədqiqata çıxara bilərik:
N. Gəncəvinin həyatı və yaradıcılığı hansı keyfiyyətlərinə görə bu qədər uca
tuta bilər? və s.
C)
"Açar sözlər"dən və sual əvəzliklərindən istifadə etməklə tədqiqat
suallarının qurulması. Bu sözlərə ona görə belə ad verilmişdir ki, açarın hansı
funksiya daşıdığı göz önünə gətirilsin.
Əgər biz onun vasitəsi ilə qıfılı açıb içəri daxil oluruqsa, bu sözlər də
istənilən bir mövzuya daxil olmağa həmin imkanı yaradır. Yetər ki, həmin sözləri
iştirakı ilə mövzuya və dərsin məqsədinə uyğun suallar qurulsun.
Müəllim
şagirdlərin diqqətini bu sözlərə cəlb edir, onlara təklif edir ki, gördükləri
bu sözlərdən istifadə etməklə mövzuya dair
suallar tərtib etsinlər. Tərtib olunan sualların miqdarına məhdudiyyət
qoymağa ehtiyac yoxdur. Şagirdlər həmin "açar sözlər"ə istinadən suallar tərtib edirlər. Həmin suallar bir-bir
lövhəyə qeyd olunur və dərsin məqsədinə daha çox uyğun gələn sual tədqiqat
sualı kimi götürülür, dairəyə alınır və şagirdlərin ilkin ehtimalları bir-bir lövhəyə qeyd
olunur. Sonra dərsin növbəti mərhələsinə keçilir.
Bəzən
belə də olur ki, şagirdlər problemlə bağlı nələri öyrənmək istəyəcəklərinə dair
suallar qoymaqda çətinlik çəkirlər, belə
sualları müəyyənləşdirə bilmirlər. Belə vəziyyətdə həmin "açar sözlər"ə nəzər salmaq
kifayət edər. Yaxşı olar ki müəllim həmin açar sözlərin hər birini bir A4
formatlı bir vərəqdə yazıb daim şagirdlərin göz önündə saxlasın.
Həmin "açar
sözlər"ə xüsusiyyətlər, növlər,
rol, əhəmiyyət, səbəb, nəticə, əlaqə, quruluş, funksiya, keyfiyyət, əlamət, çatışmazlıqlar
və üstünlüklər və s. daxildir.
İş
nümunəsinə fikir verək. Məsələn, X
sinifdə Nəsimi mövzusunun tədrisi zamanı(mövzu tapdırıldıqdan sonra –F.Y.) müəllim
şagirdlərə təklif edə bilər ki, onlar müəyyənləşdirsinlər, görsünlər
hansı "açar sözlər"ə istinad
etməklə mövzuya dair suallar tərtib etmək mümkündür. Şagirdlər verilmiş "açar sözlər"dən
istifadə etməklə aşağıdakı sualları qura bilərlər:
1.
Nəsiminin
ədəbiyyat tariximizdə rolu nədən ibarətdir?
2.
Onun
həyat və yaradıcılığına hansı xüsusiyyətlər
xasdır?
3.
Nəsiminin
bədii irsinin bizim üçün əhəmiyyəti nədir?
4.
Nəsimi
irsinin üstünlükləri nədən ibarətdir?
5.
Nəsimi
irsinin ənənələrlə hansı bir əlaqəsi
vardır? və s.
Deyilənlərə yekun vurmağa çalışaq. Dərsin motivasiya mərhələsində
işlər aşağıdakı ardıcıllıqla yerinə yetirilir:
-
Simvollu
material təqdim olunur,
-
Onun
haqqında şagirdlərin təəssüratı soruşulur, fikirlərini əsaslandırmaq xahiş
olunur,
-
Cavablar
ümumiləşdirilir və şagirdlərdən soruşulur: burada nədən söhbət gedirdi?
-
Şagirdlərin
cavabı dinlənildikdən sonra onlara sual verilir: deməli, bu gün biz nə haqqında söhbət
açacağıq?
-
Şagirdlərin
cavabı alınandan onlara təşəkkür edilməklə mövzunun adı dəqiq formada lövhəyə
qeyd olunur,
-
Mövzuya
tədqiqat sualı qoyulur və o da lövhəyə qeyd olunur,
-
Tədqiqat
sualına şagirdlərin ilkin cavabları (fərziyyələri) alınır və yığcam şəkildə tədqiqat
sualının altında lövhəyə yazılır.
Motivasiyanı
yaratmaq işində hansı variantın seçilməsi mövzunun xarakterindən və müəllimin
istəyindən asılıdır.
Motivasiya
mərhələsi tədqiqat sualına verilən
cavabların lövhədə qeyd olunması ilə yekunlaşır. Dərsin növbəti mərhələsinə
keçilir.
2. Tədqiqatın aparılması mərhələsi.
Bu mərhələdə irəli
sürülən fərziyyələrin yoxlanılması, dəqiqləşdirilməsi üçün şagirdlərin tədqiqat
aparmalarına şərait yaradılır. Müəllim əvvəlcədən qrup tapşırıqların hazır
edir. Bu tapşırıqlarda dərsin məqsədini əhatə edən müddəalar əsas götürülür. Əgər
mövzunun öyrənilməsi məqsədi 3-5 maddə arasındadırsa, deməli, o maddələr tədqiqat
zamanı mütləq araşdırılmalı və şagirdlər problemi hərtərəfli tədqiq etmək
bacarığını kiçik qrup (ola bilsin ki, dərsdə fərdi, cütlərlə, böyük qrupla iş
formalarından istifadə oluna bilər. Bu amili unutmaq olmaz – F-Y.) formasında
nümayiş etdirilməlidir.
Bu mərhələdə
müəllim sinifdəki şagirdlərin miqdarını nəzərə almaqla neçə qrup yaradacağını,
o qruplara hansı tapşırıqlar verəcəyini əvvəlcədən müəyyən etməlidir. Burada
hansı iş formasının seçilməsi(fərdi, cütlərlə, kiçik qrupla, böyük qrupla)
olduqca vacibdir. Hansı iş formasının seçilməsi isə proqram materialının
verdiyi imkandan asılıdır. Elə mövzular var ki, kiçik qrupla iş, eləsi də var
ki, böyük qrupla iş formasında həyata keçirilə bilər.
Qrup
tapşırıqları verilən zaman yaddaşı, məntiqi,
tənqidi və yaradıcı təfəkkürü inkişafa sövq etdirən suallar (tapşırıqlar) sisteminə
müraciət olunmalıdır. Yaddaş, hafizə insanın həyatda mövcud olmasını şərtləndirən
ən vacib amillərdən biridir. O yoxdursa, deməli, insan da yoxdur. Qrup
tapşırıqları verilərkən elə etmək lazımdır ki, suallardan biri şagirdlərin
hafizəsini yoxlamağa imkan yaratsın. Müəllim elə sual qoymalıdır ki, şagirdlər
mətni oxuduqdan sonra onun məzmununu düzgün xatırlasınlar, yadlarına salsınlar,
əldə etdikləri biliyi bir siyahı formasına sala bilsinlər, əlamətləri keyfiyyətləri
düzgün və dəqiq sadalasınlar, onları düzgün qeyd etsinlər, nələri isə
unutmadıqlarına əmin olsunlar.
Məntiqi
təfəkkür də yaddaş əsasında formalaşır və insanın bir varlıq kimi
formalaşmasında mühüm rol oynayır. Biz əldə etdiyimiz biliklərə, məlumatlara, həyat
təcrübələrimizə o zaman sahib çıxırıq ki,
bu bilikləri müxtəlif nöqtələrdən qiymətləndirə bilirik, onları əvvəlki
biliklərimizlə müqayisə edir, tutuşdurur, oxşar və fərqli cəhətləri ayırd edir,
qruplaşdırır, əsasları ikinci dərəcəli cəhətlərdən uğurla ayıra və seçə bilir,
onu təhlil edir, şərh edir, səbəbini tapır, nəticə çıxarırıq. Bu əməliyyatları
yerinə yetirmək məhz məntiqi təfəkkürün hesabına baş verir. Kimdə bu cür
bacarıqlar daha çox inkişaf edirsə,
onlar həyatda bir o qədər də uğur
qazanmış olurlar. Bu cür insanlarda çaşma, səhv etmə, yanlış yola düşmə qətiyyən
ola bilməz. Deməli, qrup tapşırıqları zamanı elə etmək lazımdır ki, onlardan
biri də məhz məntiqi təfəkkürün inkişaf etdirilməsinə yönləndirilmiş olsun.
Tənqidi
təfəkkür də yaddaş materialından bəhrələnməklə, ona söykənməklə insana isbat
edir ki, əldə olunanlardan da yaxşısına
sahib çıxa bilərsən. Əldə etdiyin biliklər, həyat təcrübəsi və s. sənə kifayət
edirmi, ona dəyər ver, münasibətini bildir və bu qənaətini əsaslandır, səhvləri
tap, düzgün olanını seç. Tənqidi təfəkkürü lazımi səviyyədə formalaşmış insan hər
bir fakt və hadisəni olduğu kimi görməkdən əlavə, ona hərtərəfli yanaşa, təhlil
edə, qərar verə və əsaslandırılmış münasibət ifadə edə bilir. Ona görə də qrup
tapşırıqları verilərkən elə etmək lazımdır ki, tənqidi təfəkkürün inkişafı
etdirilməsinə dair də suallar qoyulsun.
Yaradıcı
təfəkkür də yaddaşdan, hafizədən mayasını götürür insanın həyatına bir işıq,
yaradıcılıq, qurub-yaratmaq əzmi gətirir. İnsan təkcə təqlid etmir, mexanizmini
mənimsədikdən sonra daha mükəmməllərini və səmərəli olanını yaradır. İnsanın
fantaziyası hər bir şeydə yeni-yeni əlamət, hərəkət və keyfiyyətlər yaratmağa
qadirdir. Belə təfəkkürə sahib olan insanlar öz həyatlarını rəngarəng qurmağı
bacarır, cəmiyyətin inkişafına təkan vermiş olurlar. Təsadüfi deyildir ki, son iyirmi ildə təfəkkürün
inkişaf etdirilməsi ən vacib məsələ kimi gündəmdə saxlanılmaqdadır. Deməli,
qrup tapşırıqları hazırlananda qoyulan suallardan bir də yaradıcı təfəkkürün
inkişaf etdirilməsinə aid olmalıdır.
Deməli,
biz dərslərdə məhz elə tapşırıqlardan
istifadə etməliyik ki, onlar şagirdlərimizin həm hafizəsini, həm də düşüncələrinin
daim inkişafda saxlaya bilsin.
Tapşırıqlar
yazılı şəkildə icra olunduğundan suallarda bu ifadələr – yazın, qeyd edin, yazılı şəkildə ifadə edin, yazılı şəkildə əsaslandırın,
yazılı şəkildə göstərin və s. öz yerini tutmalıdır. Yoxsa şagirdlər
tapşırığı şifahi icra edərlər və bunun da heç bir faydası ola bilməz. Təəssüf
ki çox zaman müəllimlər tapşırıqda nəzərə alınmalı olan bu vacib məqamı unudur
və səhvlərə yol verirlər.
Yaddaşa
dair tapşırıqda aşağıdakı sözlərdən birinin iştirakı kifayət edir: öyrən, əzbərlə,
yadına sal, xəyalında canlandır, danış, ifadə et, tap, siyahını tərtib et,
sadala, təsdiqini tap(əsaslandır), hər hansı bir sıraya, növə aid et, göstər, tərif
ver.
Məntiqi
təfəkkürün inkişaf etdirilməsinə dair tapşırıqda aşağıdakı sözlərdən
birinin iştirakı bəs edər: təsvir et, müqayisə et, oxşarlıqları və fərqləri
tap, təsnif et, qur, dəyişdir, hesabla, sadələşdir, müəyyən et, öz tərifini
ver, əlaqəni aşkar et, sxem, qrafik, cədvəl düzəlt, tərtib et davam et, təhlil
et, izah et, şərh et, nəticə çıxar, səbəbi tap(səbəb, nəticə), ümumiləşdir, əsas
ideyanı seçib ayır, mahiyyətini ifadə et.
Tənqidi təfəkkürün inkişaf etdirilməsinə dair
tapşırıqda verilmiş sözlərdən birinin iştirakı kifayətdir: müxtəlif baxış
nöqtələrindən qiymətləndir, əhəmiyyətini, rolunu qiymətləndir, meyarları müəyyən
et, meyar cədvəlini tərtib et, səhvləri tap, faktları uydurmadan seçib ayır,
mübahisəli məqamları aşkar et, tənqidi yanaş, düzgün olanı seç, ən mühüm predmetləri və hadisələri müəyyən
et, əhəmiyyətini sübut et, öz ideyanı əsaslandır, ən səmərəli yolu tap, məsləhət
ver.
Yaradıcı təfəkkürün inkişafına dair tapşırıqda əks
oluna bilər: hekayə, situasiya,
nağıl, musiqi, üsul uydur; maket, model, sxem, qrafik, kitab tərtib et; proqnoz
ver, müqayisə et və analoqunu tap, ixtira et, yarat, başqa obyektə döndər, yeni
tətbiq üsulunu tap, dəyişikliklər et, yenidən tərtib et, yeni əsaslar üzərində
təsnif et, yeni şəraitə uyğun hala gətir, öz şəxsi mülahizəni ver, problemi müəyyən
et, fərziyyələr söylə, mübaliğə et. Minimuma endir, simvol şəklində təsvir et.
Tədqiqatın
aparılması mərhələsində tədqiqat sualına
verilən ilkin cavabı – fərziyyələri yoxlamaq və təsdiq etmək baxımından
qrup işlərinə start verilir. Müəllim bilik - tədqiqat mənbələrini elan edir,
şagirdləri qruplara bölür, hər qrupu tapşırıq və iş vərəqləri ilə təmin edir,
tapşırığın necə icra olunacağına dair
ümumi təlimat verir, tədqiqatın aparılacağı müddəti elan edir.
Uşaqlar
vaxt büdcəsini və tədqiqatlarının necə dəyərləndiriləcəyini
bilməlidirlər. Bunun üçün müəllim əsas meyarları sinfə elan edir. Tədqiqat işlərinin nəticələri ayrıca vərəqlərdə qeyd olunur. Bu vərəqlər
işçi vərəqləri adlanır.
Tədqiqatın
aparılması mərhələsi şagirdlərin iş vərəqlərində qeyd etdirdikləri məlumatlarla yekunlaşır. Yəni
verilmiş vaxt ərzində görülən işlərin nəticəsi iş vərəqlərində öz əksini tapır.
-
Tədqiqatın
aparılması mərhələsində müəllim dərsin məqsədini əhatə etməyən suallardan
istifadə edə bilər.
-
Tapşırıqların
düzgün həlli variantını qruplara
yaxınlaşıb özü söyləyə bilər.
-
Ola
bilsin ki, tapşırıqlarda məntiqi, tənqidi və yaradıcı sualları düzgün qoya bilməz.
-
Suallar olduqca qəliz və mürəkkəb ola bilər.
-
Şagirdlərin tədqiqat işlərinin gedişində müəllim
bir seyrçi kimi qalar və ya işin gedişinə gərəksiz müdaxilələr edər.
Bunlara
qətiyyən yol vermək olmaz. Qrup tapşırıqlarındakı suallar qısa, aydın, sadə və
şagirdlərin güclərinə müvafiq qoyulmalıdır. Tədqiqata ayrılan vaxt azalanda, yəni
iki dəqiqə, bir dəqiqə qalanda onu şagirdlərə elan etmək lazımdır. Tədqiqatın
gedişində müəllim dəstəkləyici və nəzarətedici işləri yerinə yetirməlidir.
Tədqiqatın
aparılması mərhələsi şagirdlərin iş vərəqlərinə cavablarının qeyd edilməsi ilə
yekunlaşır.
3. Məlumat mübadiləsi mərhələsi. Bu mərhələdə müəllim hər bir qrupun təqdimatına
neçə dəqiqə vaxt ayrıldığını elan edir. Şagirdlər tədqiqatın nəticələrini –
qrup işlərini bir-bir sinfə təqdim etməyə başlayırlar. Bunun üçün hər qrupdan
bir nəfər(qrup lideri) tədqiqatın nəticələrini sinfə çatdırır. Əgər ona suallar
olarsa, onu cavablandırır və əyləşir.
Müəllim
bu mərhələdə şagirdləri bir-birilərinin təqdimatlarına qulaq asmağa səfərbər etməlidir. Bütün qrupların təqdimatları
bitdikdən sonra irəlicədən müəyyən edilmiş meyarlar əsasında qiymətləndirmə həyata
keçirilir.
Məlumat
mübadiləsi mərhələsi lövhəyə yapışdırılmış iş vərəqləri ilə yekunlaşmış olur.
Bu mərhələdə
müəllim aşağıdakı səhvləri buraxa bilər:
-
Qrupun
birinə çox, digərinə az vaxt ayırar
-
İş
vərəqlərinin bir-birinin üstünə yapışdırtdırar
-
Təqdimatlar
zamanı liderlər iş vərəqlərini qarşısını örtmüş olar,
-
Qiymətləndirmə
meyarlarını qabaqcadan elan etmədən qiymətləndirmə aparar,
-
Öz
fikrini əsaslandırmaq əvəzinə, şagirdlərə onu zorla qəbul etdirər.
-
Qrup
işlərinin təqdimatında hər dəfə eyni şagirdi lövhəyə dəvət edər,
-
Təqdimat
zamanı öz münasibətinə dərhal açıqlayar.
4. Məlumatın müzakirəsi və təşkili(qruplaşdırılması) mərhələsi. Bu mərhələdə
təqdim olunan qrup işlərinə nəzər salınır, onlardakı məlumatlar üzərində
müşahidələr aparılır, üst-üstə düşən və düşməyən məqamlara şagirdlərin diqqəti
cəlb olunur, ümumiləşdirmələr aparılır.
Bunu bir qədər ətraflı şəkildə izah edək.
Təsəvvür
edin ki, lövhəyə 5 qrupun iş vərəqləri asılmışdır. Müəllim qiymətləndirməni
bitirdikdən sonra həmin iş vərəqlərindəki məlumatların müzakirə ediləcəyini
elan edir. Şagirdlərə bildirir ki, Gəlin,
indi iş vərəqlərimizdə əldə etdiyimiz məlumatlara birlikdə nəzər salaq,
onlardakı oxşar fikirləri müəyyən edək, yığcamlaşdıraq və yekun bir məlumat ortaya
qoyaq. Beləliklə, qrup işlərini birləşdirilən və fərqli cəhətlər müəyyən
olunur və yekun bir rəyə gəlinir. Dediklərimizi əyaniləşdirə. Tutaq ki, birinci
qrupun işində müzakirə apararaq verilən əlamətlərin "ata"ya aid
olduğunu, eyni ilə digər qruplarda "ana"ya, "bacı"ya,
"qardaş"a, "nənə"yə aid olduğu müəyyən edildi. Sonra müəllim
həmin əlamətlərin bir yerə cəmlənməsini və nə alına biləcəyini soruşur. Təbiidir
ki, şagirdlər bu əlamətlərə görə "AİLƏ" anlayışını ortaya
qoyurlar(aşağıdakı sxemə baxın).
1 2 3 4 5 yekun
|
|
ailə |
|||||||||||
Ata +
ana + bacı + qardaş + nənə =
Bu mərhələdə
ümumiləşdirmə və təsnif etməni istənilən cür təşkil etmək olar. Müəllim
unutmamalıdır ki, iş vərəqlərindəki məlumatlar, dərsin məqsədinə uyğun formada
müşahidə etdirilməli, həmin vərəqlər arasında rabitə tapılmalı, "körpülər"
qurulmalı, oxşar fikirlər bir tərəfə, fərqlilər isə başqa tərəfə toplanmalı və
yekun qənaət ortaya qoyulmalıdır. Həmin yekun qənaət axtarışların nə ilə nəticələndiyini
yığcam formada şagirdlərin gözü önündə canlandırmalıdır.
Bu mərhələdə
müəllim tərəfində aşağıdakı səhvlər buraxıla bilər:
-
Qrupların
təqdim etdiyi iş vərəqləri üzərində şagirdlərin müşahidəsini düzgün təşkil edə
bilməz,
-
Müzakirə
üçün sualları düzgün qoya bilməz,
-
İş
vərəqlərindəki məlumatları düzgün ümumiləşdirtdirə bilməz, əvəzində bu işi özü
edər,
-
Ümumiləşdirmə,
yekun rəyi dərsin məqsədindən kənar məsələlərlə bağlayar,
-
Şagirdlərin
sərbəst müşahidə aparmalarına, fikir yürütmələrinə imkan yaratmaz.
Bu mərhələ ya yekun qənaətlərin yeni bir vərəqdə
qeyd olunması ilə, ya da mövcud iş vərəqlərinin tezisləri üzərində "+"
və ya "-" işarələrinin qoyulması ilə bitir.
5. Nəticələrin çıxarılması mərhələsi. Bu mərhələ dərsin ən vacib məqamını
özündə əks etdirir. Burda görülən iş o
olur ki, tədqiqatların yekununu əks etdirən qənaətlərlə motivasiya mərhələsindəki tədqiqat
sualı və ona dair irəli sürülmüş ilkin fərziyyələr tutuşdurulur, nələrin
üst-üstə düşdüyü, nələrin isə yeni olduğu aydınlaşdırılır. Bu mərhələnin
yekununda artıq yeni biliyin əldə edilməsi özünü göstərir.
Bu mərhələdə
müəllim tərəfindən aşağıdakı səhvlər buraxıla bilər:
-
Yekun
qənaətlə dərsin ilk mərhələsində əksini tapan tədqiqat sualı və ilkin fərziyyələr
düzgün əlaqələndirilə bilməz,
-
Müəllim
əlaqələndirici sual düzgün qoya bilməz,
-
Bu
mərhələni - tutuşdurmanı və digər işləri
müəllim özü icra edər.
6. Yaradıcı tətbiqetmə mərhələsi. Dərsin növbəti mərhələsi yaradıcı tətbiq etmədir. Bu mərhələdə əldə
olunmuş yeni bilik yaradıcı şəkildə tətbiq olunur. Bunun üçün müəllim yaradıcı
tapşırıqlardan istifadə edir. Həmin tapşırıqların məzmunu və xarakteri yaradıcı
təfəkkürün inkişafına dair bir qədər əvvəldə verdiyimiz məlumatda(bax: səh. 75)
əks olunmuşdur. Müəllim mövzunun tələbindən, dərsin məqsədindən irəli gələn
istənilən yaradıcı tapşırığı ümumi formada şagirdlərə elan edir, kim nəyi
bacarırsa onu da yerinə yetirir.
Bu mərhələdə
müəllim aşağıdakı səhvləri edə bilər:
-
Yaradıcı
tapşırıq əvəzinə möhkəmləndirici suallardan istifadə
-
Bütün
şagirdlərin yaradıcılıq işlərinin nəticələri ilə tanışlıq.
-
Vaxt
rejiminə düzgün əməl etməmək,
-
Şagirdlərin
işlərinin dinlənilməsində diqqətsizlik, qeyri-səmimilik, dəstəkləyici münasibətin
olmaması
Bu mərhələ
şagirdlərin yaratdıqları iş nümunələrinin təqdimi ilə yekunlaşır. Həmin mərhələdə
bir neçə şagirdin işi dinlənilməli və haqqında mütləq müsbət fikirlər söylənməlidir.
7. Refleksiya. Bu mərhələdə biliyin əldə olunması yollarına nəzər
salınır. Şagirdlərdən soruşulur ki, gəlin görək biz bu bilikləri necə əldə etdik? Əvvəlcə, nədən başladıq?
Sonra hansı işləri gördük? Daha sonra nə
etdik? və bu qayda ilə davam edilir. Bu sözün mənası əldə olunmuş biliyin,
keçilən yolun şüurda canlandırılmasıdır.
Bu mərhələdə
müəllim aşağıdakı səhvləri buraxa bilər:
-
Biliklərin
əldə olunması ardıcıllığını düzgün soruşa bilməz,
-
Sualların
qoyuluşunda uzunçuluğa yol verər?
-
Biliyin
əldə olunması yolunu ancaq özü şərh edər.
Fəal/interaktiv
təlimdə tədqiqatın aparılması iki istiqamətdə olur – induktiv və deduktiv.
Buna uyğun olaraq da iki dərs tipi
yaranır. İnduktiv dərs tipindən yeni biliklərin verilməsi zamanı, deduktiv dərs
tipindən isə təkrarlama, ümumiləşdirmə və tətbiq dərslərində istifadə olunur.
Fəal/interaktiv
təlimi formasında keçilən dərslər birbaşa elmi-tədqiqat işinin aparılmasını
xatırladır. Yəni problem qoyulur, onun həllinə dair ilkin fərziyyələr irəli
sürülür, sonra həmin fərziyyələri
yoxlamaq üçün tədqiqatlar aparılır, tədqiqatların nəticələri işçi vərəqlərində
qeyd olunur və sinfə təqdim olunur,
ilkin fərziyyələrlə müqayisə edilir və nələrin dəqiqləşdirildiyi barədə
hesabat verilir. Bir fərqi vardır ki, bu tədqiqatlar fərdi xarakterli deyildir.
Burada problemin araşdırılmasında kiçik qruplar iştirak edir.
İstər ənənəvi,
istərsə də fəal/interaktiv təlim və TTİMY texnologiyası ilə aparılan dərslərdə
təlim, tərbiyə və inkişaf məqsədləri, dərslərin təchizatı, istifadə olunan
metodlar, dərslərin mərhələləri və təxmini vaxt bölgüsü qeyd olunmalıdır.
?!
1. Ədəbiyyat
tədrisinin təşkili dedikdə nə başa
düşülür?
2. Planlaşdırmaya
nələr daxildir?
3. İllik,
yarımillik və gündəlik plan barəsində nə öyrəndiniz?
4. Planlaşdırmanın
əhəmiyyəti nədən ibarətdir?
5. Dərs
mərhələləri barəsində nə kimi biliklərə malik oldunuz?
6. Ənənəvi
və fəal təlimlə keçilən dərslər barəsində Sizdə nə kimi təsəvvür yarandı?
7. Fəal
təlimlə keçilən dərslərin quruluşu barəsində nə söyləyə bilərsiniz?
8. Motivasiya
mərhələsinin vəzifəsi nədən ibarətdir və onu necə yaratmaq olar?
9. Motivasiya
mərhələsi nə ilə yekunlaşır?
10. Tədqiqat
işləri necə təşkil olunmalıdır?
11. Tədqiqatın
nəticələri necə təqdim olunur?
12. İş
vərəqlərində əksini tapan məlumatlar necə əlaqələndirilməlidir?
13. Ümumiləşmələrin aparılması, alınan qənaətlərin
ilkin fərziyyələrlə müqayisəsi nə uçun lazımdır?
14. Refleksiya
mərhələsində hansı işlər görülür?
Комментарии
Отправить комментарий