Ədəbi əsərlərin təhlili(deduktiv dərslər))
2. Məktəbdə ədəbi
əsərlərin təhlili
(deduktiv dərslər)
Ədəbi əsərlərin öyrənilməsində ən mühüm mərhələ
onun təhlil olunmasıdır. Ədəbi təhsilin qarşısına qoyulan mühüm işlər məhz həmin
mərhələdə reallaşır. Əsərin məzmununda əksini tapan məsələlər – əxlaqi-mənəvi dəyərlər,
müsbət insani keyfiyyətlər,
çatışmazlıqların tənqidi və s.
bu əsərlərdə öz əksini tapır. Şagirdlərdə onları müşahidə etdirmək, duydurmaq, qiymətləndirmək bacarığının
formalaşdırılması bu gün vacib işlər sırasındadır. Bunsuz gənc nəslin yüksək mənəvi
dəyərlər ruhunda böyüməsində heç bir irəliləyiş əldə etmək olmaz.
Ədəbi əsərlər müəlliflərin fakt və hadisələrə
həssas münasibəti nəticəsində ortaya çıxır..
Bu münasibəti bir anda olsa yaddan çıxarmaq olmaz. Ətraf mühit, mənəvi məsələlər,
psixoloji məqamlar bütün keyfiyyətləri ilə sənətkarın duyğular aləmindən keçir.
Ona görə də bədii irsin öyrənilməsində sənətkarın ətraf aləmə belə duyğulu yanaşmasına lazımi diqqət yetirilməlidir.
Bədii əsərlər – irs həm də gələcək nəsillərə
təqdim olunan, ünvanlanan əmanətlərdir. Onu lazımınca duymaq, obyektiv qiymətini
vermək bizim işimizdir. Unutmayaq ki, bədii irsin əsl qiymətverəni zamanın
özüdür. Öyrəndiyiniz bir çox əsərlər zamanın sərt sınağından üzü ağ çıxaraq bu
günümüzə gəlib çıxmışdır. Yaxşı bilirsiniz ki, zaman – əsrlər süzgəcindən hər
cür əsərlər keçə bilmir.
Ədəbi əsərlərin məzmunu kifayət qədər dərindən
öyrənildikdən sonra onun təhlili həyata keçirilməlidir. Bu işi "Ədəbiyyat
və həyat həqiqətləri" məzmun xəttidəki 1.2. əsas standartının tərkibindəki
alt-standartlar, eləcə də şifahi və yazılı nitq məzmun xətlərindəki
alt-standartlar yerinə yetirməlidir.
Ədəbi əsərlər, qeyd etdiyimiz kimi, bir həyat məktəbidir. Bu məktəbdə insan üçün
öyrəniləcək, təhlil ediləcək, araşdırılacaq çox məsələlər vardır. Bunun üçün də
həmin yollara bələd olmaq olduqca vacibdir. Bu yolları məişətimizdə problemsiz
olaraq tətbiq edirik. Nədənsə xoşumuz gələndə bunun səbəblərini asanlıqla izah
edirik, bəyəndiyimiz və ya bəyənmədiyimiz yerləri, keyfiyyətləri əsaslandırmağa
çalışırıq. Bədii əsərlərin təhlilində də təxminən eyni qayda vardır.
Müəllim bunlardan sonra metodikanın göstərdiyi üsullara,
vasitələrə bələd olmalıdır. Əsərin təhlil olunması işində müəllimin sənətinə
sevgisi, fəallığı və təşəbbüskarlığı da bu prosesdə az rol oynamır və bütün bu
deyilənlər bütöv bir kompleksi yaradır.
Deməli, müəllim həm nəzəri cəhətdən ətraflı
biliyə malik olmalı, həm də konkret bir əsərin təhlili qaydalarına yiyələnməlidir.
O, yalnız bundan sonra ədəbi əsərləri lazımi səviyyədə təhlil etdirər və belə
bir keyfiyyətləri şagirdlərinə aşılaya bilər. Bizim də məqsədimiz odur ki, hər
iki tərəf – həm müəllim, həm də şagird ədəbi
əsərləri təhlili yollarına dərindən bələd olsunlar. Bu yolları bilən şagird istənilən
əsərlərin müstəqil təhlil olunmasında elə bir çətinlik çəkməyəcəklər. Əslində
şagirdlərinə məhz belə bir bacarığı aşılamağı müəllim ciddi bir vəzifə kimi
qarşısına qoymalıdır.
Ədəbi əsərlərin öyrədilməsində ən mühüm mərhələ
təhlil dərslərinin təşkil olunmasıdır. Təhlil dərsləri əsərin iştirakçılarına,
müəllif mövqeyinə, şeir parçalarındakı lirik və ya satirik obraza, onlarda ifadə
olunan əhvali-ruhiyyəyə, əsərlərin bədii-sənətkarlıq məsələlərinə münasibətlərin
aşkarlanması yolu ilə həyata keçməlidir. 1.2. əsas standartında bu məsələlər
lazımi şəkildə ifadə olunmuşdur.
Epik və dramatik əsərlərdə şagirdlər obrazların hərəkət və
davranışlarını, daxili və xarici keyfiyyətlərini, əsərdəki yeri və mövqeyini,
ifadə etdiyi əxlaqi-mənəvi dəyərləri düzgün dərk etməlidirlər. Unutmaq olmaz
ki, müəllif yaratdığı obraz və ya obrazlar silsiləsi vasitəsilə bizə hansısa
bir fikri təlqin edir. Əsərdə cərəyan edən əhvalat və hadisəni elə-belə,
boş-boşuna danışmır. Ona görə də obrazların hər birinin fərdi keyfiyyətləri
vardır və bu keyfiyyətlər şagirdlərə bəlli olmalıdır. Obrazların qarşılıqlı
münasibətləri, intriqa və ya ziddiyyətlərin səbəbləri, hadisələrin gedişatı, müəllif
mövqeyinin dərk edilməsi, obrazların hərəkət və davranışlarının motivləri
diqqətlə araşdırılmalıdır.
Lirik
əsərlərdə lirik qəhrəman və onun keçirdiyi əhval-ruhiyyə, epik əsərlərdə təhkiyəçi obrazı, surətlər
aləmi, dramatik əsərlərdə
personajların hərəkəti, monoloq və dialoqlar, remarkalar diqqətlə təhlilə cəlb
olunmalıdır. Bu cür təhlillərdə müəllimin
mühazirəsindən istifadə yolverilməzdir. Həmin təhlillərdə Əsas məsələ fakt
və hadisəyə şagirdin özünün müstəqil yanaşmasına şərait yaratmaqdır.
Müşahidələr göstərir ki, biliyin bu cür qazanılması daha möhkəm və davamlı
olur.
Deməli, proqram materialının xarakterindən
və sinfin səviyyəsindən asılı olaraq mətn üzrə şagirdlərin müstəqil işlədilməsi
diqqət mərkəzində saxlanılmalıdır.
Şagirdləri mübahisə aparmaq mədəniyyətinə yiyələndirmək, söylənilən rəylərə
hörmət etmək, öz mövqeyini müdafiə etmək bacarığını məhz təhlil dərslərində öyrətmək
lazımdır.
Təhlil dərslərinin məğzində "Ədəbiyyat
və həyat həqiqətləri" məzmun xəttinin 1.2. əsas standartlarının tələbələrinin
ödənilməsinə diqqət yetirilməlidir. Bu standartın tərkibindəki
alt-standartlarda nəzərdə tutulan bilik və bacarıqların inkişaf dinamikası
aşağıdakı kimidir:
V sinifdə:
Şagird:
1.2. Bədii nümunələrin təhlili üzrə bacarıqlar nümayiş
etdirir.
1.2.1. Şifahi və yazılı ədəbiyyat nümunələrini müqayisə
edir.
1.2.2. Obrazların xarakterindəki başlıca xüsusiyyətləri
aydınlaşdırır, əsaslandırılmış münasibət bildirir.
1.2.3. Şifahi və yazılı ədəbiyyat nümunələrində bədii təsvir
vasitələrinin (epitet, təşbeh) rolunu aydınlaşdırır.
1.2.4. Bədii nümunələrin mövzu və ideyasını aydınlaşdırır,
münasibət bildirir.
VI sinifdə:
Şagird:
1.2. Bədii nümunələrin təhlili üzrə bacarıqlar nümayiş
etdirir.
1.2.1. Bədii nümunələri
(əfsanə, nağıl, dastan, təmsil, hekayə) janr xüsusiyyətləri baxımından
müqayisə edir.
1.2.2. Bədii nümunələrdəki qəhrəmanları davranış və əməllərinə
görə səciyyələndirir.
1.2.3. Bədii nümunələrdə təsvir və ifadə vasitələrinin
(epitet, təşbeh, mübaliğə, bədii sual) rolunu aydınlaşdırır.
1.2.4. Bədii nümunələrin mövzusunu, ideyasını şərh edir, əsaslandırılmış
münasibət bildirir.
VII sinifdə:
Şagird:
1.2. Bədii nümunələrin təhlili üzrə bacarıqlar nümayiş
etdirir.
1.2.1. Bədii nümunələri
(dastan, hekayə, mənzum hekayə) növ və janr baxımından müqayisə edir.
1.2.2. Digər obrazlarla müqayisə etməklə və yazıçının
münasibətinə əsaslanmaqla ədəbi qəhrəmanları səciyyələndirir.
1.2.3. Bədii nümunələrdə təsvir və ifadə vasitələrinin
(epitet, təşbeh, mübaliğə, bədii sual, təkrir, litota) rolunu aydınlaşdırır.
1.2.4. Bədii nümunələrin mövzusunu, ideyasını və başlıca
problemini şərh edir, əsaslandırılmış
münasibət bildirir.
VIII sinifdə:
Şagird:
1.2. Bədii nümunələrin təhlili üzrə bacarıqlar nümayiş
etdirir.
1.2.1. Bədii nümunələri (dastan, hekayə, novella, dram,
poema) növ və janr baxımından müqayisə edir.
1.2.2. Obrazları nitqinə, bağlı olduqları məişət təsvirlərinə
əsaslanmaqla səciyyələndirir.
1.2.3. Bədii nümunələrdə təsvir və ifadə vasitələrinin
(metafora, bədii təzad, kinayə) rolunu
aydınlaşdırır.
1.2.4. Bədii nümunələrin ideya-məzmununu, süjet, kompozisiya
xüsusiyyətlərini şərh edir, əsaslandırılmış münasibət bildirir.
IX sinifdə:
Şagird:
1.2. Bədii nümunələrin təhlili üzrə bacarıqlar nümayiş
etdirir.
1.2.1. Bədii nümunələri (hekayə, povest, roman, dram, poema)
növ və janr baxımından müqayisə edir.
1.2.2. Digər obrazların və müəllifin mühakimələrinə əsaslanmaqla
ədəbi qəhrəmanları səciyyələndirir.
1.2.3. Bədii nümunələrdə təsvir və ifadə vasitələrinin
(metonimiya, inversiya, simvol) rolunu aydınlaşdırır.
1.2.4. Bədii nümunələrin mövzusunu, ideya-bədii xüsusiyyətlərini
və konfliktini şərh edir, onlara əsaslandırılmış münasibət bildirir.
X sinifdə:
Şagird:
1.2. Bədii nümunələrin təhlili üzrə bacarıqlar nümayiş
etdirir.
1.2.1. Müxtəlif vəznli (heca, əruz, sərbəst) şeirləri və süjetli bədii nümunələri (dastan, poema,
hekayə, povest, roman, dram, komediya, faciə) janr, dil baxımından müqayisə edir.
1.2.2. Davranış və əməllərinə, başqaları ilə qarşılıqlı
münasibətlərinə, yazıçının mövqeyinə, digər surətlərin mühakimələrinə əsaslanmaqla
obrazları təhlil edir.
1.2.3. Müxtəlif vəznli
(heca, əruz, sərbəst) şeirlərdə, süjetli
ədəbi nümunələrdə bədii təsvir və ifadə vasitələrinin obrazlılığın
yaradılmasındakı rolunu aydınlaşdırır və
münasibət bildirir.
1.2.4. Bədii nümunələrin mövzusunu, ideya-bədii xüsusiyyətlərini
bağlı olduğu dövrün sosial-siyasi, mənəvi dəyərləri baxımından təhlil edir və nəticə
çıxarır.
XI sinifdə:
Şagird:
1.2. Bədii nümunələrin təhlili üzrə bacarıqlar nümayiş
etdirir.
1.2.1. Müxtəlif vəznli (heca, əruz, sərbəst) şeirləri və süjetli əsərləri (poema, hekayə, povest,
roman, dram, komediya, faciə) kompozisiya, dil, üslub baxımından təhlil edir.
1.2.2. Obrazları xarakter və əməlləri, yaşadıqları dövrün
sosial-siyasi şəraiti və əxlaqi-etik dəyərləri ilə əlaqəli səciyyələndirir,
müqayisələr aparır.
1.2.3. Müxtəlif vəznli (heca, əruz, sərbəst) şeirlərdə,
süjetli bədii nümunələrdə bədii təsvir və
ifadə vasitələrinin obrazlılığın təmin edilməsindəki roluna əsaslandırılmış
münasibət bildirir.
1.2.4. Bədii nümunələrin mövzusunu, ideyasını, başlıca
problemini, konfliktini dövrün ictimai-siyasi, mənəvi dəyərləri kontekstindən
çıxış etməklə münasibət bildirir və qiymətləndirir.
Ədəbi əsərləri təhlil
edərkən müəllim metodik baxımdan aşağıdakı məsələləri diqqət mərkəzində
saxlamalıdır:
§ Əsərin təhlili
prinsiplərinə bələdlik
§ Əsərin təhlilinə həsr
olunan dərslərin düzgün planlaşdırılması və həyata keçirilməsi.
- Əsəri
təhlil etmənin əhəmiyyəti barədə nə deyə bilərsiniz?
- Əsərin
təhlili nə zaman uğurlu alına bilər?
- Təhlil
prosesində müəllimin ümumi və xüsusi hazırlığı dedikdə nələr nəzərdə
tutulmalıdır?
- Əsərin
təhlilində hansı təlim-tərbiyə vəzifələri güdülməlidir?
Комментарии
Отправить комментарий