Ədəbiyyat dərslərində əyanilik
Ədəbİyyat dərslərİndə əyanİlİk
Ədəbiyyat təliminin keyfiyyətini yüksəldən
amillərdən biri də dərs prosesinin əyaniləşdirilməsidir.
Təlim materiallarının dərk olunmasında əyaniliyin
mühüm əhəmiyyəti vardır. O, şagirdlərin fikri fəallığının təmin olunmasına,
biliklərin asan qavranılmasına şərait yaradır. Ətraf aləmin dərk olunmasında
siqnallar mühüm rol oynayır. Pavlovun iki siqnal sistemi barəsində dedikləri əyan
təlimin özəyini təşkil edir. O öyrədirdi ki, biz birinci siqnal sistemi sayəsində
ətraf aləmi duyur və qavrayırıq. Birinci siqnal sisteminin qıcıqlandırıcıları
cisim və hadisələrin özləridir. Bu xüsusiyyət bütün canlılara məxsusdur. İkinci
siqnal sistemi isə bu cisim və hadisələri ifadə edən sözlər – işarələr sistemidir.
Onların vasitəsi ilə biz haqqında danışılan obyektləri, mənzərəni görməsək də
aydın təsəvvür edə bilir, göz önündə canlandırırıq. Ona görə də sözlərə
"siqnallar siqnalı" da deyirlər. Məhz biz sözlərin sayəsində biz ətraf
aləmlə tanışlığımızı daha dərindən davam etdiririk. Əyani təlimdən söhbət gedəndə
biz hər iki məqam diqqət yetirməliyik. Həm cisim və ya hadisənin sinfə gətirilməsinə,
həm də söz assosiasiyası vasitəsi ilə onların əyani təsəvvür olunmasına,
qavranılmasına şərait yaratmalıyıq.
Əyanilik biliklərin həm də şüurlu
qavranılmasına şərait yaradır. Onun hesabına davamlı bilik əldə olunur. Bəzən gənc müəllimlər bu işə
lazımınca diqqət yetirmirlər. Təbii ki, belə bir vəziyyətdə təlimin keyfiyyətindən
danışmaq olmaz. Əyanilik təlimin canlı və maraqlı olmasına şərait yaradır.
Ədəbiyyat dərslərində proqram
materiallarının xarakterindən asılı
olaraq müxtəlif əyani vasitələrdən istifadə etmək olar. Onları aşağıdakı
kimi ümumiləşdirə bilərik:
Þ
Müəllimin canlı, obrazlı və emosional sözü əyaniliyin
başlıca vasitəsi kimi
Þ
Tabaşir əyani vasitə kimi
Þ
Əlavə ədəbiyyatların(bədii, elmi, publisistik,
xatirə və s.) dərsə cəlb olunması
Þ
Sxem, slaydlar, cədvəl, xəritə, portret,
illüstrasiyalar
Þ
Sənətkarın həyatına,
əsərlərinə dair fotomontajlar
Þ
Lent yazıları(audio və video kasetlər)
Þ
Sənədli və yaxud bədii filmlər(fraqmentlər)
Þ
Şəxsi əşyaların, məktubların nümayiş olunması və s.
Bunların hər birinin təlim prosesində öz
yeri və əhəmiyyəti vardır. Amma müəllimin canlı və obrazlı sözünü heç nə ilə əvəz
etmək mümkün deyildir. Məlum məsələdir ki, söz insanlar arasında ünsiyyət
yaratmanın mühüm vasitələrindəndir. Danışan qarşıya qoyduğu məqsəddən, dinləyicinin
diqqətini hansı cəhətlərə yönəltmək istəməsindən asılı olaraq sözləri seçir,
sistemə salır, ona uyğun gələn səs tonunu və digər texniki məsələləri səfərbər
edir. Danışıq prosesinin özündə isə təbii formada emosional keyfiyyətlər,
mimika və jestlər işə düşür. Danışıq tərzi, natiqlik məharəti, mövzuya hərtərəfli
bələd olmaq, məzmunluluq, dinləyiciyə fəal təsir göstərmək imkanları bu nitqi təsirli və inandırıcı edir.
Müəllim sözlər vasitə ilə şagirdlərin gözləri
qarşısında istənilən mənzərəni bütün incəliyi ilə canlandıra bilər. Sözün
imkanları belə təsəvvürlərin yaradılmasında rəssamın fırçasından da böyük qüdrətə
malikdir. Təbii ki, bu lövhələrin canlandırılması sözün hüdudsuz imkanlarından
xəbər verir. Ataların sözlə bağlı dediyi müdrik kəlamlarından bir neçəsini yada
salmaq kifayətdir: Sözün vəsfinə söz çata bilməz, söz qılıncdan itidir, qılıncla ala bilmədiyini
bir şirin kəlmə ilə ala bilərsən, söz var adamı dağa qaldırar, söz var dağdan
endirər və s.
Biz sözün bu cür ecazkar təsir gücündən
istifadə etməklə istədiklərimizə nail olmağa çalışırıq. Təlim prosesinin uğurlu
təşkil olunması ilk növbədə müəllimin bu sözdən necə istifadə etməsindən çox
asılı olur. Müəllim ana dilinin gözəl bilicisi olmalı, onun nitqindən doğma
yurdun gözəl abı-havası, xoş rayihəsi gəlməlidir. Bu nitq uşaqların xəyallarını
çox-çox uzaqlara aparmağı bacarmalı, onlarda gözəl ovqat yaratmalıdır. Haqqında
danışdığı məsələlər bir kino lenti kimi uşaqların gözü önündən keçməlidir. Müəllimin
sözü bir sıra vacib tələbləri(elmi, pedaqoji, psixoloji və metodik) gözləməlidir.
O, ifadəli, obrazlı, təsirli olmalı, səsi cəlbedici, canlı, səmimi, aydın,
anlaşıqlı, məlahətli bir çalara bürünməlidir.
Dərs zamanı müəllimin sözünü adlarını çəkdiyimiz
digər əyani vasitələr müşayiət etməlidir. Müəllim həmin vasitələrdən yerində
istifadə etməyi bacarmalıdır. Yerində deyilməyən söz kimi, yerində təqdim
olunmayan əyani vasitənin də təlimə xeyri yoxdur. Bunun üçün yüz ölçülüb bir
biçilməlidir. O, dərsin maraqlı və canlı olmasına xidmət göstərməlidir.
Ənənəvi
dərslərdə əyani vasitələrə bilik mənbəyi
kimi baxılır və onun asan qavranılması imkanları kimi başa düşülürdü.
Yuxarıda dediklərimiz məhz əyaniliyi bu yönümdən izah edir. Bu gün əyaniliyə tələb
bir qədər də artmışdır. Dərsə cəlb olunan hər bir əyani vəsait polemika üçün şərait
yaratmalıdır. Əgər onun müzakirə predmetinə çevrilmə imkanı yoxdursa, o hərəkətsizdirsə,
onda biz materialı birtərəfli qaydada, monoloqvari, şabloncasına şagirdlərə
çatdıracağıq. Deməli, əyani vasitələr imkan daxilində biliyin müzakirə,
interaktiv yolla qavranılmasına imkan yaratmalıdır.
?!
1.
Əyaniliyin təlim
prosesində əhəmiyyəti nədən ibarətdir?
2.
K. D. Uşinskinin əyanilik
barəsində söylədiklərinə nə əlavə etmək olar?
3.
Ədəbiyyat dərslərində
əyaniliyin növləri barəsində nə kimi məlumat əldə etdiniz?
4.
Ənənəvi və müasir dərsdə
əyaniliyə münasibət eynidirmi?
Комментарии
Отправить комментарий