Ədəbiyyat dərsinin növləri. Metodbirləşmələr
ƏDƏBİYYAT DƏRSLƏRİNİN NÖVLƏRİ. METODBİRLƏŞMƏLƏR
Ədəbiyyat kursunun məzmununu əsasən ədəbi əsərlər
təşkil edir. Ədəbiyyat dərsinin növlərindən danışanda istər-istəməz öncə bu
materialların tədrisinə həsr olunan dərslərə nəzər salmalıyıq.
Ədəbi
əsərlərin öyrədilməsinə həsr olunan dərslər. Ədəbi əsərlərin
seçilib proqrama daxil edilməsində bir çox amillər nəzərə alınır. Onlardan biri
də ədəbiyyatdan təlim nəticələrinin əldə olunmasına və məzmun standartlarının
reallaşdırılmasına xidmət etmək baxımından ədəbi əsərlərin verdiyi imkanların nəzərə
alınmasıdır. Bu rəsmi tələbdir və dərslik siyasəti ilə bağlı rəsmi sənəddə
bununla bağlı konkret göstərişlər də verilmişdir.
Təlim nəticələrinə və standartların məzmununa
əsasən sinfidən-sinfə təqdim olunan əsərlərdə, onların qaldırdığı ideyalarda da
fərqlər özünü göstərməyə başlayır. Bunu aydın təsəvvür etmək üçün əvvəlcə müxtəlif siniflər üzrə standartların təqdim
etdiyi janrları nəzərdən keçirək:
V sinifdə:
- Heca vəznli şeirlər və sadə süjetli bədii
nümunələr - əfsanə, nağıl, təmsil, hekayə.
VI sinifdə:
- Heca vəznli şeirlər və süjetli bədii
nümunələr - əfsanə, nağıl, dastan, təmsil, hekayə.
VII sinifdə:
- Heca vəznli şeirlər və süjetli bədii
nümunələr - dastan, hekayə, mənzum hekayə.
- Müxtəlif vəznli (heca, əruz) şeirlər və
süjetli əsərlərdə -dastan, hekayə, novella, dram, poema.
IX sinifdə:
- Müxtəlif vəznli (heca, əruz, sərbəst) şeirlər və süjetli əsərlərdə
- poema, hekayə, povest, roman, dram.
X sinifdə:
- Müxtəlif vəznli (heca, əruz, sərbəst)
şeirlər və süjetli əsərlər - dastan, poema, hekayə, povest, roman, dram,
komediya, faciə.
Göründüyü kimi, şeirlər və əfsanə, nağıl,
təmsil və hekayə ilə tanışlıq V sinifdə dərinləşdirilir. Bu siniflərdə həm
janrların forma xüsusiyyətləri, həm də standartların nəzərdə tutduğu işlər
yerinə yetirilməlidir.VI sinifdə dastanlar işə qoşulur. Onun forma elementləri
də bu sinifdə şagirdlərə təqdim olunur. VII sinifdə mənzum hekayə, əruz vəzni,
VIII sinifdə əlavə olaraq novella, dram, poema, IX sinifdə povest, X sinifdə
komediya, faciə ilə şagirdlərin tanış edilməsi nəzərdə tutulmuşdur.
Standartların məzmunundan o aydın olur ki,
V-XI siniflərdə ədəbiyyat fənninin əsas obyekti bədii əsərlərdir. "Ədəbiyyat
və həyat həqiqətləri" məzmun xətti əsərlərin öyrədilməsi zamanı iki əsas
standart ətrafında işlərin görülməsini tələb edir. Bunlardan birincisi (1.1.) "Bədii
nümunələrin məzmununu mənimsədiyini nümayiş etdirir", ikincisi isə (1.2.) "Bədii
nümunələrin təhlili üzrə bacarıqlar nümayiş etdirir" adlanır. Bu məzmunlardan
göründüyü kimi bədii mətnlər üzərində işi iki istiqamətdə aparmaq lazım gəlir: əsərin
məzmununun öyrədilməsi, əsərin təhlilinin həyata keçirilməsi.
Əsərin məzmunun öyrədilməsi zamanı görülən
işlə təhlilinin aparılması zamanı aparılacaq işin məzmunu eyni ola bilməz. Məhz
buna görə də əsas standartların tərkibindəki alt- standartlar öz başlıqlarına
uyğun işləri yerinə yetirirlər. Ədəbiyyat dərslərinin növlərindən danışılanda
bu iki nəzərə alınmalıdır. Onda aşağıdakı dərs növləri yaranmış olur:
1. Ədəbi əsərlərin məzmununun öyrədilməsinə həsr
olunan dərslər. Bu dərslər şagirdlərə ədəbi əsərin məzmununu öyrədilməsi
işini şagirdlərdə məzmunun mənimsənildiyini nümayiş etdirən bacarıqları aşılayır.
Həmin bacarıqlara nələrin daxil olması isə alt-standartların məzmununda ifadə
olunmuşdur. Əsərin həcmi böyük olarsa, onun tədrisinə 2 saat vaxt ayrılarsa,
onda birinci dərs saatında məzmun, ikinci dərs saatında isə təhlil işləri həyata
keçirilməlidir. Əgər əsərin tədrisinə 3 saat vaxt verilmişdirsə, onda iki saat
məzmun üzərində işə, bir saat isə təhlil işlərinə həsr olunmalıdır.
Məzmununa 2 saat ayrılacaq dərslərdə fasiləli
oxu üsulunun tətbiqi daha məqsədəuyğundur. Bəzən müəllimlər əsərin birinci dərs
saatında məzmun işlərini sinifdə aparır, əsərin qalan hissələrini isə evdə
oxumağı tövsiyə edirlər. Bu düzgün yol deyildir. Mətnlərin sinifdə səsləndirilməsi
olduqca vacibdir. Müəllimlər əsasən orada çətinlik çəkirlər ki, fasiləli oxu ilə
bir dərs saatında o boyda mətni səsləndirmək və digər işləri yerinə yetirmək
olmur, vaxt çatmır. Onlar haqlıdırlar. Amma çox sadə və aydın çıxış yolu vardır. Bunun üçün müəllim əvvəlcədən
dəqiq müəyyən etməlidir ki, oxuya təxminən neçə dəqiqə vaxt ayıracaq, sonra həmin
müddət ərzində sinifdə nə qədər səhifənin oxunması mümkün olacaq. Əsərin fasiləli
oxusu üçün təxminən 10 dəqiqənin ayrılması məqsədəuyğundur. Əgər birinci dərs üçün öyrəniləcək əsərin həcmi 6-7 səhifəyə qədərdirsə və ondan 4 səhifəni
oxumaq mümkündürsə, onda müəllim əvvəlki iki səhifənin yığcam, qısa məzmununu
danışmalı, qalan səhifələrin fasiləli oxusunu həyat keçirməlidir. Eyni iş
ikinci dərs saatında da davam etdirilməlidir.
Əsərin
həcmi daha böyük olanda, ona iki dərs saatı ayrılanda ev oxusuna bu halda
müraciət oluna bilər: əsəri həcminə görə
təxminən 4 hissə bölürük: 1, 2, 3, 4. Birinci dərsdə 1-ci hissənin oxusunu
yuxarıdakı qaydada aparırıq, 2-ci hissəni evdə oxumağı tapşırırıq, 3-cü hissəni
sinifdə oxuyuruq, 4-cü hissəni evdə oxumağa tapşırırıq. Unutmayaq ki, nəsr əsərlərinin
tədrisində fasiləli oxu bitəndən sonra digər dərs mərhələləri üzrə işlər davam
etdirilməlidir. İşin sırasının motivasiya, fasiləli oxu, tədqiqatın aparılması,
məlumat mübadiləsi, məlumatların müzakirəsi və təşkili(qruplaşdırılması), nəticənin
çıxarılması və nəhayət yaradıcı tətbiqetmə və qiymətləndirmə kimi olması məqsədəuyğundur.
Məzmunun öyrənilməsinə həs olunan dərslər
yeni bilik verən dərslər sayılır. Onlara induktiv dərslər deyilir.
2. Ədəbi əsərlərin əhlilinə həsr olunan dərslər. Bu cür dərslərdə
1.2. əsas standartının tələbələri yerinə yetirilir. Adətən təhlil dərslərinə 1
saat vaxt ayrılır. Dərsin qurulması ya müzakirə, yada tədqiqat
yolu ilə aparıla bilər. Bu dərslər möhkəmlətmə, tətbiq xarakteri daşıdığından
onlara deduktiv dərslər deyilir.
3. Ədəbi əsərlərin məzmun və təhlilinin birlikdə
öyrənilməsinə həsr edilən dərslər. Şeirlərin bir çoxu dil baxımdan sadə və həcmcə yığcam olduqlarına görə onların öyrənilməsinə həsr olunan dərslərdə məzmun və
təhlil işləri(məzmun (1.1.) və təhlillə(1.2.) bağlı əsas standartlarının tələbləri)
birgə icra olunur. Adətən belə əsərlərin tədrisinə bir saat vaxt ayrılır. Belə
dərslərə qovuşuq, qarışıq tipli dərs demək olar. Bunlarda yeni bilik verilməsi
də, biliklərin tətbiqi də həyata keçirilir(Həm induktivlik, həm də
deduktivlik).
Ədəbiyyat
nəzəriyyəsi materiallarının öyrədilməsi. Ədəbiyyat fənni üzrə ədəbi
əsərləri ədəbi-nəzəri məlumatlar müşayiət edir. Həmin məlumatlara ədəbi
janrlar, bədii təsvir və ifadə vasitələri barəsində təqdim olunan şərhləri
daxil etmək olar. Buradan da ədəbiyyat nəzəriyyəsinə
dair məlumatların verilməsi zərurəti ortaya çıxır. Dərslik və standartlar bunun
üçün ədəbiyyat nəzəriyyəsinə dair təqdim olunan məlumatları ayrıca dərs növü kimi
tədrisə gətirilməsini vacib hesab etmir.
Janrlarla bağlı ədəbi-nəzəri məlumatlar təhlil
dərslərində nəzərdən keçirilir. Amma təsvir və ifadə vasitələri ilə bağlı həm məzmun,
həm də təhlil dərslərində şagirdlərin müstəqil işləri təşkil olunur. Məzmun dərslərində
onların ancaq müəyyən olunması, təhlil dərslərində isə rolunun
aydınlaşdırılması bir tələb kimi irəli sürülür.
Bu cür material üzərin işlər
a) əsərin
tədrisi prosesində,
b) əsərin təhlili başa çatdıqdan sonra
aparıla bilər.
Alt-standartlarda
əksini tapan bədii təsvir və ifadə vasitələrini siniflər üzrə diqqətinizə
çatdırırıq:
V sinifdə: epitet, təşbeh.
VI sinifdə: epitet, təşbeh, mübaliğə, bədii sual.
VII sinifdə: epitet, təşbeh, mübaliğə,
bədii sual, təkrir, litota.
VIII sinifdə: metafora, bədii təzad,
kinayə.
IX sinifdə: metonimiya, inversiya, simvol
X sinifdə: epitet, bənzətmə, metafora, metonimiya, simvol,
mübaliğə, litota, bədii sual, təkrir, bədii təzad, inversiya.
XI sinifdə: epitet, bənzətmə, metafora,
metonimiya, sineqdoxa, simvol, mübaliğə, litota, bədii sual, təkrir, bədii təzad,
kinayə (sarkazm), inversiya.
Bir qədər əvvəldə qeyd etdiyimiz ədəbi növ və janrlar barəsində məlumatları
da bu materialların yanında hesab etsək,
onların nə qədər əhatəli olduğunu görərik.
Yeni kursun tələbinə uyğun olaraq
standartlarda nəzərdə tutulan məsələlər barəsində dərslərdə məlumatların verilməsi
deyil, bu və ya digər nəzəri məsələnin müşahidə olunması, rolunun
aydınlaşdırılması əsas vəzifə kimi şagirdlərin qarşısına qoyulur.
İcmal
materiallarının öyrədilməsi. Ədəbiyyat kursunda əhatə olunan materiallardan
bir qimi də giriş, ədəbi-tarixi
və sənətkarın həyatı, yaradıcılıq yolu başlığı altında təqdim olunan
icmallardır.
Giriş mövzuları kursun
başlanğıcında özünü göstərir. Kursa bələdçilik edir. Bu cür mövzuların tədrisi üçün
1 saat vaxt ayrılır.
Ədəbi-tarixi icmallar yeni kursda VIII-IX
sinifdən dərsliyə daxil edilmişdir. Həmin siniflərdə onun tədrisinə vaxt
ayrılmamışdır. Tanışlıq xarakterlidir və başlıq altında təqdim olunan əsərlərin
öyrənilməsinə, məzmununun, ideya-bədii xüsusiyyətlərinin düzgün dərk olunmasına
bir bələdçilik edir.
Bu
mövzuların da əsas cəhəti orasındadır ki, bir neçə əsrlik dövrün ədəbi-mədəni xülasəsini şagirdlərə təqdim edir. Bu zaman bəzən
elə olur ki, bir neçə əsrlik tarixi və ədəbi-mədəni mühit əhatə olunur, 5-6 sənətkar
barəsində məlumatlarla şagirdlərin tanış etdirilməsi nəzərdə tutulur. X-XI siniflərdə layihə
formasında(dərslikdə bu söz nisbi mənada işlənib – F.Y.) tədrisinə bir saat
vaxt ayrılır
Həmin siniflərdə təqdim olunan sənətkarın həyatı, yaradıcılıq yolu materialları
da icmal xarakterlidir. Onun məzmununda tərcümeyi-hal və sənətkar
yaradıcılığının ümumi mənzərəsi əks olunmuşdur. Bu cür mövzuların tədrisi üçün 1 saat vaxt ayrılmışdır. Standartlarda
belə bir məlumat verilməsi nəzərdə tutulmasa da, biz də bunların dərsliklərdə
olmasını vacib hesab edirik.
Ədəbiyyat
dərslərində şifahi və yazılı nitqin inkişafı.
Ədəbiyyat dərslərində şagirdlərin şifahi və yazılı nitqinin inkişaf
etdirilməsi bu gün ən vacib tələblərdən biri kimi qarşıya
qoyulmuşdur. Ədəbi əsərlərin öyrənilməsinə həsr olunan dərslərdə nəzərdə tutulacaq 3 işdən ikisi – şifahi nitq
və yazılı nitq məzmun xətlərində əhatə olunmuşdur. Hər bir dərs bu məzmun xətləri
üzrə alt-standartların reallaşdırılmasını mütləq mənada diqqətdə saxlamalıdır.
Dərsin təlim nəticələrində şifahi və yazılı nitq məzmun xətlərindən uyğun gələn
alt-standartlar da əks olunmalıdır. Bunu fəndaxili inteqrasiya da bu cür tələb edir. Hər bir dərsdə şagirdlərin nitqinin
inkişaf etdirilməsi, ünsiyyət bacarıqlarının formalaşdırılması müəllimin diqqətində
olmalıdır.
Ənənəvi kursun XI sinfində isə giriş,
icmal materialları, sənətkarın
həyatı, sənətkarın yaradıcılığının ümumi mənzərəsi, konkret bir bədii əsəri proqrama
salınmışdır.
Ənənəvi kursda hər bir materialın öyrədilməsi üçün ümumi qaydalar
var idi. Proqram materialları qruplaşdırılır və
onların hər birinin öyrənilməsinə həsr olunan dərs tipləri yaranırdı. Bu
dərslər belə adlanırdı:
1. Ədəbi əsərlərin öyrədilməsinə
həsr olunan dərslər (yeni kursda forma qalır, öyrədilməsi yolları tamamilə dəyişir),
2. Tərcümeyi-hal materiallarının
öyrədilməsinə həsr olunan dərslər (yeni kurs X-XI siniflərdə, dərsliklərdə
layihə formasında "sənətkarın həyatı, yaradıcılıq yolu" adı altında bu
materialı təqdim edir, tədrisinə 1 saat vaxt ayırır. Öyrədilməsi forması dəyişir),
3.
İcmal materiallarının öyrədilməsi dərsləri (yeni
kurs X-XI siniflərdə layihə formasında bu tipli materialları dərslikdə verir, tədrisinə
1 saat vaxt ayırır. Öyrədilməsi forması
dəyişir).
4. Ədəbiyyat nəzəriyyəsi
materiallarının öyrədilməsi dərsləri (yeni kursda ayrıca nəzərdən
keçirilmir, dərs prosesində müstəqil işlər formasında icra olunur),
5.
Nitq inkişafına həsr olunan dərslər (yeni kursda
bu iş ayrıca nəzərdən keçirilmir, hər bir dərsdə bu işlər icra olunur).
Bu dərslərin necə olmasına dair yanında
verilən qeydlərə nəzər salın.
Ənənəvi kursda 5 dərs növü ortaya çıxırdı.
İndi biz o qədər dərs növünü ortaya çıxarmağa bir zərurət görmürük. Çünki yeni
kursda mövzuların tədrisi tədqiqat və möhkəmlətmə xarakteri daşıdığından ədəbiyyat dərslərinin aşağıdakı növləri ortaya çıxır.
Materialların xarakterinin, məzmununun nə
olmasından asılı olmayaraq bu dərs növləri keçərli sayılır.
Siz
proqram materialları kimi, ədəbiyyat
dərslərinin də bir-birilərinə bənzəməyəcəyi fikrinə şərik çıxacaqsınız. Onda deyilənləri ümumiləşdirərək proqram
materiallarının məzmununa uyğun olaraq ədəbiyyat dərslərinin növlərini aşağıda qeyd edək:
1. İnduktiv (yeni bilik və bacarıqları verən
dərslər),
2. Deduktiv(bilik
və bacarıqların tətbiqini, möhkəmləndirilməsini həyata keçirən dərslər),
3. Məzmun və təhlil işlərini birgə həyata keçirən
qovuşuq tipli dərslər.
Fəal(interaktiv) dərslərdə proqram
materiallarını məzmunu dərsin növünü yaratmır.
Əsas məsələ yeni bilik və bacarıqların formalaşdırılması və ya möhkəmləndirilməsi
ilə bağlıdır.
Yeni bilik verən dərslər(induktiv) fəal(interaktiv)
dərslərin bütün mərhələlərini özündə cəmləşdirir. İcmal mövzuları, ədəbi əsərlərin
məzmunu üzərində işlər bu formalı dərslər üzərində qurulur.
Möhkəmləndirmə(tətbiq) dərsləri –deduktiv
dərslər isə həm 7 mərhələli, həm də bir neçə mərhələli ola bilər. Bu formalı dərslər
isə təhlil dərslərində, tətbiq dərslərində istifadə olunur. Bu seçim müəllimin
özündən asılıdır. Bir neçə mərhələli dərslər daha çox müzakirə formasında həyata
keçirilir.
Fəal(interaktiv) təlim formasında keçilən
dərslər birbaşa elmi-tədqiqat işinin aparılmasını xatırladır. Yəni problem
qoyulur, onun həllinə dair ilkin fərziyyələr irəli sürülür, sonra həmin fərziyyələri yoxlamaq üçün tədqiqatlar
aparılır, tədqiqatların nəticələri işçi vərəqlərində qeyd olunur və sinfə təqdim
olunur, ilkin fərziyyələrlə müqayisə
edilir və nələrin dəqiqləşdirildiyi barədə hesabat verilir. Bir fərqi vardır
ki, bu tədqiqatlar fərdi xarakterli deyildir. Burada problemin araşdırılmasında
kiçik qruplar iştirak edir.
Metodbirləşmələr
Başlıca vəzifəsi müəllimlərə metodik yardım göstərməkdir.
Onun məktəbdaxili, məktəblərarası və rayon üzrə formaları vardır. Məktəbdaxili
metodbirləşmə ən azı üç nəfər ixtisas müəllimi olduqda yaradılır. Müəllimlərin
sayı üçdən az olduqda fənbirləşmələrini yaratmaq lazım gəlir. Burada iş planı tərtib
olunur və həftədə bir dəfə iclasları keçirilir.
İş planı məktəb rəhbərliyi tərəfində təsdiq olunur. İş planının məzmununa
aşağıdakı məsələlər daxil edilir:
1. Təqvim-tematik(yarımillik)
planların tərtibi, müzakirə və təsdiqi
2. Açıq dərslərin
qrafikinin tərtibi və təsdiqi
3. İş təcrübələrinin öyrənilməsi
və yayılması
4. Metodiki yeniliklərlə
müəllimlərin tanış edilməsi
5. Elmi-metodik
seminarların, konfransların keçirilməsi
1.
Ədəbiyyat dərslərinin tipləri nələri əhatə edir?
2.
Onların məzmunu barəsində
nə deyə bilərsiniz?
3.
Ədəbiyyat dərslərinin
tiplərinin yaranması səbəbi barəsində nə deyə bilərsiniz?
4.
Metodbirləşmə nədir və
necə fəaliyyət göstərir?
Комментарии
Отправить комментарий