Ədəbiyyat müəllimindən tələb olunan keyfiyyətlər
FƏAL/İNTERAKTİV DƏRSLƏRDƏ ƏDƏBİYYAT
MÜƏLLİMİNDƏN TƏLƏB OLUNAN
KEYFİYYƏTLƏR
Ədəbiyyat müəllimi və ümumiyyətlə müəllim hansı
keyfiyyətlərə malik olmalıdır sualına hərə bir cür cavab verə bilər. Təbii ki,
öncə rəsmi sənədlərimizin müəllimlərin
qarşısına qoyduğu vəzifələri yada salmalıyıq. Bunun üçün Ümumi təhsil pilləsinin
dövlət standartı və proqramı(kurikulumları) sənədinin "təhsilverənlərin
keyfiyyət göstəriciləri" bölməsini və digər sənədlərin məzmununu bir daha
xatırlayın.
-
dövrün tələbatına uyğun gələn elmi-nəzəri bilik;
-
uşaqlarla ünsiyyət qurma və iş bacarığı;
-
əxlaqi-mənəvi keyfiyyət, pedaqoji etika və mədəniyyət;
-
əməkdaşlıq, tədqiqatçılıq, özünütəhsil və idarəçilik
bacarıqları;
-
layihə, müsabiqələrdə, innovativ proqramlarda iştirak etmək
qabiliyyəti;
-
öz fəaliyyətini təqdim etmək, qabaqcıl təcrübədən bəhrələnmək
bacarığı;
-
ədalətlilik, məsuliyyətlilik, cavabdehlik keyfiyyəti;
-
məktəb və ictimaiyyət arasında nüfuzu.
Ədəbiyyat müəllimi həm də təhsil alanların bilik, bacarıq və vərdişlərinin səviyyəsini ümumi şəkildə ifadə edən məzmunu da bilməlidir. Təhsilalanların bilik, bacarıq və vərdişlərinin səviyyəsini müəyyən edən təlim nəticələri və məzmun standartlarıdır. Onlarda aşağıdakı tələbələr gözlənilməlidir:
-
fərdin, dövlətin, cəmiyyətin maraq və tələbatının
ödənilməsi;
-
təhsilin nəticəyönümlülük,
şagirdyönümlülük, inteqrativlik prinsipləri əsasında qurulmasına didaktik zəmin
yaradılması;
-
təhsilalanların həyati bacarıqlara yiyələnməsinin
prioritet hesab edilməsi;
-
keyfiyyətli təhsil almaq üçün hamıya bərabər
imkanların yaradılması;
-
təhsil səviyyələri üzrə təhsil
proqramlarında (kurikulumlarda) varisliyin təmin olunması;
-
şagird nailiyyətlərinin qiymətləndirilməsi
üzrə müvafiq standartların müəyyən edilməsi üçün etibarlı əsas
yaradılması;
-
təhsilalanların sağlamlığının qorunması məqsədi
ilə ağırlaşdırıcı tədris materiallarının təlim prosesinə gətirilməsinin
qarşısının alınması.
Digər rəsmi sənədlərin
tələbləri də öz yerində. Müəllim bu sənədlərdən xəbərsiz öz fəaliyyətlərini qətiyyən
davam etdirə bilməzlər.
Bizim nəzərimizdə
ədəbiyyat müəllimi bir günəşə bənzəyir. Təsadüfi deyildir ki, internetdə yerləşdirdiyimiz
feysbuk səhifəmizi biz məhz bu cür adlandırmışıq: ədəbiyyat müəllimi, sən
bir günəşsən.
Müəllimin mənəvi siması, daxili aləmi ilə səsləşən
bir məsəli Sizlərə çatdırmaq istəyirəm. Belə nəql edirlər ki, bir gün bir neçə nəfər Qazının yanına şikayətə gəlir ki,
bəs bilməzsənmi, filan kəndin mollası oğurluq edib. Ona sözünüz nədir?
Qazı təmkinini pozmadan molla oğurluq eləməz
deyir. Həmin şəxslər bildirir: - Necə yəni molla oğurluq eləməz?! Oğurladığı əşya
ilə birlikdə bir azdan Sizin hüzurunuza gətirəcəklər. Bəs onda sözünüz nə
olacaq? Qazı əfəndi təmkinini pozmadan yenə də molla oğurluq eləməz deyir. Həyətdən müxtəlif səslər eşidilir.
Adamlar yanlarında da həmin kəndin oğurluq üstündə tutulan mollası və
oğurladığı əşya ilə qeyzlə Qazının otağına daxil olurlar. Şikayətçilər mollanı
və oğurladığı əşyanı Qazıya göstərərək hirsli vəziyyətdə soruşurlar: - İndi
buna sözünüz nədir? Qazı yenə təmkinini pozmadan "Molla oğurluq eləməz"
deyir. Deyir ki, O oğrudur ki, gəlib Molla olub. Molla oğruluq eləməz.
Hikmətə fikir verişinizmi? Bəli, müəllim olan kəs
daima öz adını uca tutmalıdır. Əsl müəllimi başqa cür də təsəvvür etmək olmaz.
Əziz həmkarlarım. Bu müəllim ad sizə necə də yaraşır.
Çünki harada olursunuzsa-olun, əməllərinizdə nəciblik, ürəyinizdə hərarət,
simanızda bir nur olur. Sizi digər sənət yoldaşlarından fərqləndirən əsas
keyfiyyət də məhz orasındadır ki, siz müqəddəs və ülvi mənəviyyatımızın,
poeziyamızın, nəsrimizin, dramaturgiyamızın ən gözəl keyfiyyətləri ilə birbaşa
təmasda olur, onları öz mənəviyyatlarınıza köçürür və şagirdlərimizdə həmin irsə
möhtəşəm bir məhəbbət hissi aşılayırsınız. Şagirdlərimiz belə bir ədəbiyyat
nümunələri ilə tanış olduqca qəlbləri qürur və iftixar hissi ilə dolur, fəxr
edirlər ki, belə bir xalqın nümayəndəsi, belə bir zəngin sərvətin varisləridirlər.
Ədəbiyyat müəlliminə qürur gətirən amillərdən
olduqca çoxdur. Biz onların hamısını sadalasaq, onda cildlər gərək olar.
Bunlarından ən birincisi və ən əsası gələcəyimizin qurucuları olan gənc nəslin
əxlaqi-mənəvi tərbiyəsini, bir şəxsiyyət, bir vətənpərvər insan kimi yetişməsini
dövlətimizin məhz Sizlərə etimad göstərməsi, etibar etməsidir. Bu, heç kimə rəva
görülməyən, ancaq Sizlərə, Sizlərin saf mənəviyyatına, təmiz qəlbinizə, hərarətli
əllərinizin ixtiyarına buraxılan böyük
bir etimaddır. Bu inamı uca tutmaq isə hər
bu yolu seçənin, hər birimizin müqəddəs vəzifəsidir.
İkincisi, ulu öndərimiz doğma Azərbaycanımızın,
yeni ruhlu Azərbaycanımızın qurucusu və memarı olan Heydər Əliyev cənabının bizlərə verdiyi qiymət(kitabın ön səhifəsindəki
sitata baxın), göstərdiyi qayğı və bizə bəslədiyi inamdır. O qayğı ki, indi onu
hörmətli prezidentimiz İlham Əliyev cənabları bir an da olsun Sizlərdən əsirgəmir.
Üçüncü bir məqam birbaşa sizin uğurlarınızın rəhni
olacaq sevgi hissləridir. Sizlərə aşağıdakı sehrli üçbucağı təqdim edəcəyik. Əgər
bu üçbucağa əməl etsəniz müəllimlik həyatınız,
həqiqətən də, mənalı, maraqlı və faydalı olacaqdır. Bunu Sizə həmin sehrli
üçbucağı sınaqdan çıxaran, bəhrəsini görən
və 30 ildən artıq iş təcrübəsi olan müəlliminiz deyir. Əgər Sizdə səmimiyyət, üstəgəl bu sehrli
üçbucaqdakı keyfiyyətlər olacaqsa,
Sənətinə
Sevgi
|
Şagirdlərinə Vətəninə
onda Siz həmişə bir günəş kimi yetirmələrinizin
yoluna nur salacaq, özünüzü daima bəxtəvər hesab edəcək, sənətinizdən zövq
alacaqsınız. Bu yolda uğurlar daim Sizinlə olacaq.
Ürəyini, onun hərarətini, gözünün nurunu şagirdlərinə
təmənnasız olaraq bəxş edən müəllimlər ən bəxtəvər insanlardır. Bu sənətin
arxasında dayanan hər bir insan yaxşı bilir ki, müəllimlikdə də şairlikdə
olduğu kimi istedad gərəkdir. Şairlərdə istedad anadangəlmə, fitri olur. Tutaq
ki, sənin istedadın yoxdur və yazıb-yarada bilmirsən. Amma sənətində sevgi və səmimiyyətin
varsa, deməli, bu istedad artıq sənin qanındadır.
Uşaqlar, uşaq dünyası sirli, sehrli, saf və müqəddəs
bir dünyadır. Bu dünyanın qapıların hər müəllimin üzünə açıla bilməz. Bu
qapıdan içəri daxil olmaq da hər bir müəllimə müyəssər olan iş deyildir. Bu
qapıdan zorla, təhdidlə içəri daxil olmaq qətiyyən mümkün deyil. Onun açarı,
sehrli açarı yalnız SƏMİMİYYƏTDİR. Həmin səmimiyyəti isə sevgİ yaradır. Bu iki amil BİLİK,
SAVADla birləşdikdə hər şey öz yerini tutur.
Siz belə bir duyğulara sahib çıxsanız, onda bir müəllim kimi alnıaçıq
yaşamağın nə olduğunu çox gözəl hiss edəcəksiniz. Şair uşaqların dilindən necə
də gözəl ifadə edir:
Ey sevimli müəllim,
Hər könüldə yerin var.
Hər kənddə, hər şəhərdə,
Sənin meyvələrin var.
Əkdiyin ağacların,
Gülü, çiçəyi solmaz,
Dünyada Sənin kimi,
Varlı bağban tapılmaz!...
Müəllimin səmimiyyəti
uşaq dünyasının qapılarını onun üzünə
taybatay açır. Belə bir müəllimi şagirdlər çox sevir, onun hər bir sözünü çox
böyük məhəbbətlə qəbul edirlər. Müdrik Caviddəki məktəbli qız obrazını göz önünə
gətirin.
-Yavrum, qızım! Adın nədir?
- Gülbahar.
- Pəki, sənin annan, baban, varmı?
-
Var.
- Nasıl, zənginmidir baban?
- Əvət,
zəngin, bəyzadə...
- Öylə isə geydiyin neçin böylə sadə?
Yoxmu sənin incilərin,
altun bilərziklərin?
Söylə,
yavrum! Heç sıxılma…
- Var,
əfəndim, var… lakin,
Müəlliməm
hər gün söylər: "Onların yox qiyməti,
Bir
qızın ancaq bilikdir, təmizlikdir zinəti".
- Pək doğru söz…
Bu dünyada sənin
ən çox sevdiyin
Kimdir,
quzum, söylermisin?
-Ən
çox sevdiyim, ilkin,
О allah
ki, yeri, göyü, insanları xəlq eylər.
- Sonra kimlər?
- Sonra
onun göndərdiyi elçilər...
- Başqa sevdiklərin nasıl, yoxmu?
-
Var…
- Kimdir onlar?
-Annam, babam, müəlliməm, bir də bütün insanlar.
Bu şeir parçalarında təsvir olunan obraz Sizlərsiniz,
əziz gənc müəllimlər! Unutmayın ki, o saf tarlada – uşaq dünyasında nə əkəcəksinizsə,
cəmiyyətimiz, dövlətimiz də onu biçəcək.
Etiraf edək ki, bugünkü şagirdi, sinfi idarə etmək nəinki
20-30 il, elə 3-5 il əvvəlkilərdən də qat-qat çətindir. Deməli, bu günün müəllimi üçün
iş prosesində, dərslərdə şagirdlərlə işləmək qaydalarına bələd olmaq da
vacibdir. Siz özünüzdə yaxşı bilirsiniz ki, bu iş müəllimdən böyük bir məsuliyyət tələb edir. Şagirdlər
daha şahmat fiqurları kimi deyil ki, onları istənilən yerə qoyasınız, o da orda
dura. Artıq təlimdə subyekt+obyekt münasibətləri deyil, subyekt+subyekt münasibətləri
bərqərar olmalıdır. Onlar bərabərhüquqlu tərəfdaş kimi təlim prosesində fəal
işgörənə çevrilməlidirlər. Məhz buna görə də hazırda avtoritar üslubdan
demokratik üsluba keçmək, ona yiyələnmək bacarığı ən vacib tələblər sırasında
durmaqdadır. İndiki müəllimi sələflərindən fərqləndirən keyfiyyətlərdən biri də
elə budur.
Müəllimi daha həqiqəti sinfə gətirmək əvəzinə onu
tapmağın yolunu göstərir. Disterveq vaxtilə bunu belə ifadə etmişdi: Pis müəllim
həqiqəti sinfə gətirər, yaxşı müəllim isə onu tapmağın yolunu göstərər.
Yeni kursun mahiyyəti də ondadır ki, müəllim bilikləri
şagirdlərinə hazır şəkildə verməkdənsə, onlara bələdçilik edir. İşi elə təşkil
edir ki, hər şeyi şagirdin özü
araşdırsın, özü tapıb ortaya qoysun və bu "kəşfi" ilə qürur
duysun.
Elmi ədəbiyyatda müəllimin bu cür vəzifə tutması
"bələdçilik"(fasilitator) kimi adlandırılır. Bu sözün əsl anlamı
"asanlaşdıran", "yüngülləşdirən" deməkdir. Pedaqoji ədəbiyyatda
bunu bələdçi kimi ifadə edirlər. Bunu o cür də qəbul etmək olar. Hal-hazırda müəllim,
ancaq yolgöstərən rolunu öz üzərinə götürür, şagirdinə isə müstəqil
araşdırmalar aparmaq, fikir mübadiləsi etmək, düzgün qərarlar qəbul etmək fürsətini
verir.
Müəllimin bələdçi (fasilitator) mövqeyində dayanması
üçün bir sıra vacib qaydalara riayət etməsi gərəkdir. Həmin qaydalar elmi ədəbiyyatda
belə qruplaşdırılır:
1.
Psixoloji
dəstəkləmə qaydaları,
2.
Fikrin
təhrik edilməsi qaydaları,
3.
Məlumatla
təmin etmə qaydaları,
4.
Təşkilati
dəstəkləmənin qaydaları. [1]
Fəal(interaktiv) dərslərdə müəllim bu qaydalara riayət
etməlidir. Həmin qaydalarla diqqətlə tanış olmaq və iş prosesində onlara əməl
etmək gərəkdir. Sizin hər biriniz mühazirə və seminar məşğələlərində bu
qaydaların necə yerinə yetirilməsi gedişi ilə əyani şəkildə tanış olmuşsunuz. Ona görə də
dərs prosesində onlara riayət etmək sizə bir o qədər də çətin gəlməyəcəkdir. Gəlin həmin bələdçilik qaydaları ilə tanış
olaq.
I. Psixoloji dəstəkləmənin qaydaları:
1. Müsbət dil ifadələrindən istifadə edin,
müzakirədə və qrup işində iştirak etmələrinə görə iştirakçılara öz minnətdarlığınızı
bildirin (pozitiv münasibət və hörmət).
2. Danışanlara diqqətlə qulaq asın. Hər
bir iştirakçıya öz fikrini söyləməyə imkan yaradın. Qrupun yalnız yüksəkdən
danışan iştirakçılarını dinləməyinizi yox, bütün qrupun iştirakçılarını diqqətlə
dinləməyə hazır olduğunuzu nümayiş etdirin ("fəal dinləmə" vərdişi).
3. İştirakçılarla birlikdə işləyib
hazırladığınız qaydalara riayət edin. Unutmayın ki, treninq(dərs) zamanı Siz
davranış nümunəsi kimi çıxış edirsiniz (təlimçi – müəllim davranış modeli kimi).
4. İştirakçılara adları ilə müraciət edin
və onların gözlərinə baxın (fərdi yönəlmə).
5. Konstruktivliyi dəstəkləyin,
qarşıdurmaya şərait yaratmayın.
6. İştirakçıların fikirləri ilə səmimi
maraqlanın.
7. Yalnız liderlərin və ən fəalların
deyil, bütün iştirakçıların nöqteyi-nəzərinə eyni dərəcədə diqqətlə yanaşın.
8. Hər hansı bir fikrin qiymətləndirilməsində
məzəmmət və lovğalığa imkan verməyin. Lazımsız olaraq qrupun işini qiymətləndirməyin.
Müəllimin - təlimçinin qiyməti onun şəxsi fikrini əks etdirməməlidir və qiymətləndirmə
üçün yox, fasilitasiya üçün bir vasitə olmalıdır! O, iştirakçıların fikirləri
ilə razı olmadıqda, bunu onlarla müzakirə etməyi təklif etməlidir. Lakin təlimçi
işi mütləq qiymətləndirməli olduqda, o, bunu meyarlar əsasında həyata keçirməlidir
II.
Fikrin təhrik edilməsi qaydaları:
1.Motivasiya mərhələsində şagirdləri dərsin
mövzusunun müəyyənləşdirilməsinə cəlb edin.
2. Dərsə şagirdlərin məntiqi, tənqidi,
yaradıcı təfəkkürü və elmi-tədqiqat vərdişlərini inkişaf etdirən tapşırıqları
daxil edin.
3. Qapalı suallardansa, açıq suallardan
daha çox istifadə edin. Qapalı suallar – "Siz bunu bilirsinizmi?", "Nə?", "Harada?" , "Nə
vaxt?". Bu cur suallara yalnız bir
konkret cavab almaq olar: "Hə"
və ya "Yox" . Açıq suallar bir yox, bir neçə mümkün cavabı nəzərdə
tutur. Çalışın sualları "Nə üçün?", "Nəyə görə?",
"Hansı yolla?", "Necə?"
və s. sözlərlə başlayın. Açıq sualların nümunəsi: " …haqqında nə bilirsiniz?",
"Nə üçün bu haqda daha çox bilmək istərdiniz?", "Bu necə baş
verir?"
4. İştirakçılar tərəfindən ifadə olunan
fikirləri anlamağa çalışın və öyrəndiyiniz, oxuduğunuz, yaratdığınız fikirləri
zorla qəbul etdirməyin.
5. Fasilitasiya zamanı konkret
misallardan, müqayisə və qarşılaşdırma, analogiya üsullarından istifadə edin.
İstiqamət verməyən "kar"
sualları az sayda verməyə çalışın.
6. Mənaca yaxın olan yönəldici suallardan
istifadə edin, lakin bilavasitə yönəldici suallardan istifadə etməyin. Həmçinin,
əvvəlcədən şübhəli fikirdən ibarət olan çaşdırıcı suallardan istifadə edə bilərsiniz.
Bu suallar iştirakçıları sizin fikirlərinizi
təkzib etməyə təhrik edəcək və onu lazım olan istiqamətə yönəldəcək.
7. İştirakçının deyə biləcəyi sözü və
ya fikri onun əvəzinə ifadə etməyin. Mətndə
əsas fikri müəyyən etmək və onu öz sözləri ilə ifadə, ümumiləşdirmə, öz fikrini
ifadə və yenidən ifadə etmə bacarığı üzərində işləyin. İştirakçıları öz fikirlərini
daha dəqiq ifadə etməyə təhrik edin və onlara köməklik göstərin. Bunun üçün sərf
etdiyiniz vaxta təəssüflənməyin! Bu prosesi nümayiş etdirin və iştirakçıların
diqqətini buna cəlb edin!
8. İştirakçıların əvəzinə onların məhsulunu
izah etməyin, hər bir iştirakçıya digər iştirakçıların işinə öz fikir və
münasibətlərini ifadə etməyə imkan yaradın.
9. İştirakçıların cavablarının formal dinlənilməsinə
yol verməyin. İştirakçıların əsas fikirlərini ümumiləşdirib, digərlərini onların
şüuruna çatdırmaq lazımdır.
10. Fasilitasiya zamanı iştirakçıların
cavablarını dəqiqləşdirin, şərh edin (qiymətsiz, məzmununa görə), problemli
hallarda onların həllinə iştirakçıları cəlb edin.
III.
Məlumatla təmin etmə qaydaları:
1. Fasilitasiyanı başlamaq ərəfəsində
şagirdlərdə lazımi biliklərin və sizdə məlumat mənbələrinin olduğunu yoxlayın.
2. İştirakçıların şüurunda dərsin dəqiq
"şəklini" formalaşdırın.
3. Dərsdə təkcə dərslikdə olan materialdan
yox, həm də müxtəlif sənədlər, məlumat ədəbiyyatı, iştirakçıların öz təcrübə və
müşahidələrindən istifadə edin.
4. Materialın müxtəlif qavrama yollarını tətbiq
edin (görmə, eşitmə, hiss etmə və s.).
5. Sual və cavabları mümkün qədər qısa,
lakonik və şagirdlərin səviyyəsinə uyğun söyləyin.
6. Başqa şagirdlər tərəfindən deyilən yeni
anlayışların, eləcə də sualın və ya mülahizələrin yanlış anlaşılmasını vaxtında
başa salın.
7. Şagirdlərə bütün dərs ərzində problemin
həlli yolunda əldə etdikləri nailiyyətləri haqqında məlumatı və əks əlaqəni verməyi unutmayın.
IV.
Təşkilati dəstəkləmənin qaydaları:
1. Müzakirəni təşkil etdikdə yeni bilik əldə
etmək üçün hər kəsin fikrinin vacib ola bilməsini bütün şagirdlərə çatdırın. Bunu həyata keçirmək üçün
iştirakçıları aşağıdakı suallar vasitəsilə müzakirəyə cəlb edin: "Bu haqda
siz nə fikirləşirsiniz?" , "Kim razıdır, kim razı deyil?" ,
"Başqa cür bunu demək (və ya etmək) olardımı?" və s.
2. Şagirdlərdə öz fəaliyyətlərini
planlaşdırmaq və təşkil etmək bacarığını formalaşdırın.
3. Lövhədə və ya kağız üzərində qrup işi
zamanı müəyyən edilən əsas halları qeyd etmək məqsədəuyğundur. Unutmayın ki,
qrup işinin nəticələri sonrakı mərhələdə məlumatın müzakirəsi və təşkili üçün
lazımdır ("körpülərin" quraşdırılması).
4. Öz razılığını və ya narazılığını ifadə
etmək üçün şagirdlərə xüsusi işarələr təklif edin (məsələn, baş barmağın yuxarı
və ya aşağı vəziyyəti) və onlarla müzakirə zamanı əks əlaqəni verməyə təhrik
edin.
5. Destruksiya(destruksiya pozuculuq,
konstruksiya isə onun əksini bildirir, yəni qurmaq mənasında işlənir) cəhdlərinin,
artıq danışmağın, qeyri-adekvat və ya məqsədəuyğun olmayan söhbətlərin
qarşısını alın. Bunun üçün iştirakçını mədəni surətdə dayandıraraq, ona öz
fikirlərini qısa və məzmuna uyğun çatdırmaq qaydasını xatırladın. Diskussiyanın
lideri olun!
Комментарии
Отправить комментарий